Nos a caba di celebra e dos dianan clave di aña pa reflexiona riba loke nos ta haci como persona, como pais, y… como mundo. Claro cu ta riba e prome parti so nos por tin control, anto parcialmente tambe. Nos por tin contratiempo di enfermedad, di pobresa, di inkietud den nos bida pasobra nos no ta logra loke nos ta aspira. Ey nos esfuerso mester ta anto, pasobra ta eynan nos por tin mas resultado. Mientras tin di nos ta reza, otronan ta djis spera pa cos bay miho, pasobra nan no tin e apoyo di un creencia pa duna nan forsa den nan lucha personal. Con esey ta bay resulta of no, ta pa cada ken di nos pa evalua. Nos ta desea tur hende hopi forsa den loke nan kier logra.
Pero banda di nos lucha individual, nos tin un lucha colectivo pa hiba tambe. Mas ciudadano consciente y bon informa un pais tin, mas nos por tin speransa cu colectivamente nos ta bay dilanti. Esey ta naturalmente facil pa expresa, y hasta por ta berdad, pero esey no ta implica cu nos tur tin un bon bista di loke ta pasa alrededor di nos, y mucho menos cu nos tin e sentimento cu nos tin, talvez no control, pero en todo caso un cierto influencia riba con cos ta bay den nos pais. Por ta cu loke nos sa bisa, den conversacion cu otro ciudadano, o tambe na nivel di bay den medionan publico y bisa algo, para pa un opinion cu abo ta kere aden no necesariamente tin un efecto directo riba e manera con ta dirigi nos pais. Di tur manera ta un sentimento grato ora bo por ripara cu gobierno tambe ta pensa den e direccion cu abo tabata pensa y di repente bo ta mira algo surgi den cual bo ta reconoce bo mes punto di bista.
Sin embargo, cuanto biaha esey ta e caso? Cuanto biaha den un aña ta sucede algo unda bo por bisa cu satisfaccion ‘esey ta bon haci’? No cu nos kier exagera pensando cu tur dia lo mester tin algo cu nos por aplaudi; talvez un par di biaha pa aña mes ta bon. Corecto? Contento? Wel, no completamente. E cos ta cu ora nos ta fiha demasiado riba loke ta sucede den luz publico, e ley cu porfin nan ta bay cambia, e solucion cu lo bin pa e problema di dump, tur esey ta momento cu nos por bisa cu nos ta haya cu e ta bon haci of no, pero ta kita nos bista di e cosnan cu mester keda haci silenciosamente, sin cu mester di tanto debate, pasobra en general nos por ta di acuerdo cu esey ta cos cu mester drecha o haci, simplemente. Manera e caya cu por arte de magia awor di repente a haya asfalt, loke inmediatamente ta haci cu e jokenan ta surgi ta ken den e caya conoce tanto hende halto na e departamentonan concerni, o miho ainda, den e despacho di e ministro encarga. E ultimo cinismo no semper ta aplicable, pasobra por bien ta cu e asunto ta bon planifica y ehecuta. Di otro banda, pasando riba nos isla nos ta mira ehemplo tambe di cos cu ta parce un misterio. Manera ora na Noord ta drecha e caminda relativamente bon di e rotonde di Tanki Flip bay direccion di Noord, mientras cu e caminda di e luz di trafico bay Turibana, cu ta un absoluto horor, ta keda atrobe sin haya asfalt nobo. Of e caminda dilanti e highrise, cu ta birando apto pa invita e organisadornan di e careda di ciclismo profesional legendario yama Paris – Roubaix, pa usa e trayecto aki pa e competencia… bon pa turismo…?! En cambio, e parti relativamente bon dilanti Divi Phoenix si a haya asfalt nobo; aparentemente tin hende cu sa infinitamente mas cu nos di planificacion y ta dicidi cu asina ta bon. Bottom line: mas nos por ta di acuerdo cu e cosnan ‘normal’ ta tuma lugar normalmente, mas trankil y na paz nos por ta. Por lo demas nos no tin masha grip riba e situacion local.
Pero awor e ‘ver van mijn bed’show. Si como ciudadano nos kier ignora e mundo grandi rond di nos, bo por haci esey trankilamente. Bo no ta cumpra corant o no ta bay riba internet, no pa busca kico ta pasa den mundo, en todo caso. Dia cos bay malo den e mundo aki, pasobra e actornan riba e escenario mundial ta dicidi di actua robes, nos niun tin e potestad di para esey. Dia un idiota primi un boton robes, nos tur ta bay: esnan cu a preocupa tur dia, y igual esnan cu nunca a preocupa. Un invitacion na nos tur pa no preocupa cu e cosnan ey mas? Di ningun manera, aunke ta cos cu nos no tin influencia riba nan. Manera, si e Turconan kier organisa un masacre un di e dianan aki na Siria, nan por hacie, Trump a duna prmiso caba. Nos no mester subi baricada, pero mester sa kico ta bon y kico ta malo; cerca di cas, y leu tambe. Esey ta contribui na paz.
