Manera anuncia previamente, entrante 1 Juni 2021, pasaheronan cu ta residente di Aruba lo wordo exonera di haci un PCR test pa drenta Aruba ora di bolbe for di exterior.
Importante pa señala ta cu, e ta conta solamente pa pasaheronan cu ta cumpli cu e siguiente tres rekisitonan:
– Ta residente di Aruba,
– Ta registra na AZV,
– A ser vacuna na Aruba y a ricibi su certificado di vacunacion mas cu 14 dia prome cu e biahe bek pa Aruba.
Pasaheronan cu ta desea di haci uzo di e posibilidad aki tin cu indica esaki nan momento di registra via e online ED card system (https://edcardaruba.aw). E online ED card system tin cu wordo yena dentro di 72 ora prome cu e biahe di regreso pa Aruba. Ta recorda e pasaheronan aki pa durante nan yegada na Aruba, tin nan certificado di vacunacion digitalmente disponibel riba e Aruba Health App y tambe un hardcopy como backup.
