Pasado y futuro ta… Contempla segun ta conveni…?

Nos ta den un era unda nos politiconan mayoritariamente ta bolbe na pasado ora ta conveni nan, y ta referi na futuro di igual forma. No pa promer biaha y no cu ta algo unico pa nos sistema di gobernacion, pasobra den politica semper ta busca pa sconde e hechonan no conviniente y trece dilanti esunnan cu no ta cualifica como hecho. Nos por experimenta esey atrobe den e dianan aki, entre otro den e asunto di e parti di edad mayor den nos comunidad cu a yega caba na representa alrededor di 25% di nos poblacion, y creciendo. Algun politico a descubri, o mejor dicho a redescubri e tema, cu riba su mes ta un asunto cu mester atende y cu urgencia.

Pero kico nos ta mira? Cu ta papia di e problema y ta indica cierto aspecto, pero tin varios di e preguntanan clave cu nan no ta ni toca. Nan ta referi por ehemplo na e hecho cu un parti considerable di pensionado lo mester biba di un AOV parcial, loke riba su mes ta berdad y cu ta un problema cu no ta desaparece di mes. Parti di e problema ta ciudadano cu tin un pension reduci pasobra durante un cierto periodo nan no a biba na Aruba. Si acaso nan tabata na Hulanda, o un di e otro islanan Hulandes den Caribe, nan por conta cu un pension pa e periodo cu nan tabata residencia aya. Si ta na otro teritorio, anto si bo por spera problema, pasobra no necesariamente e pais ey tin e tipo di provision aki. Pero esey no ta tur. E mesun politiconan aki, o nan antecesornan di nan partido, tabata responsable pa e maneho descabeya di crea mas tanto acomodacion turistico posible, sin pensa riba e consecuencianan. Eseynan ta entre otro e grupo creciente di inmigrante cu a yega aki na un edad tal cu a haci cu nan no a cumpli cu e añanan cu un persona mester tin pa haya un pension completo. Aki no ta trata solamente di persona cu a haya nacionalidad Hulandes; esnan cu a mantene nan nacionalidad y tin residencia permanente, tambe ta haya AOV, reduci. Esaki ta loke a crea e base pa e problemanan actual unda nos como comunidad mester enfrenta e realidad di un grupo di persona di edad avanza cu lo no por percura pa nan mes, y cu ta trece e obligacion pa atende e asunto aki.

Nos ta tende politiconan papia di esaki? No, ta papia solamente di loke ta conveni nan, pues nos no ta tende ningun solucion tampoco. O talvez den cierto sentido si, pero e ta un poco mas complica pa splica. Laga nos purba contando un storia, berdadero. Mas di 10 aña pasa un di nos redactornan tabatin un conversacion cu un asesor di un di e partidonan grandi. Nan tabata discuti e cantidad grandi di hotel y otro acomodacion cu tabata den ‘pipeline’ e tempo ey. Tabata discuti e problema di e necesidad di importacion masivo di miles di trahador di exterior pasobra tabata previsible cu Aruba mes lo no tabatin un mercado laboral interno pa atende un demanda asina grandi. E reaccion di e asesor partidario tabata cu “ta net bon anto cu nan ta bin, pasobra esey ta yuda pa paga e gastonan di AZV y AOV, cu tambe ta birando un problema”. Esaki ta tipifica e mentalidad di hopi di nos politiconan. De paso a mustra e asesor cu e problema t’ey caba y lo a bira mas grave ainda, mirando cu e grupo cu ta bira di edad na Aruba, sin un pension aceptable, ta aumenta mas ainda, y lo ta un problema pa nos. Su contesta no tabata sorprendente: “Esey ta problema pa despues.”

Awor nos tin nos dilanti e problema ey, ademas nos tin e promer expresionnan di intencion pa trece un grupo grandi di trahador di exterior pa atende e demanda grandi cu ta surgi awor di e hotelnan cu ta construi caba, o ta bay construi. Kico esey ta implica? Cu mientras nos mester atende e grupo actual cu ta cay den pobreza, nos ta creando e base atrobe pa aki tanto aña atrobe nos ta hinca cu e mesun problema. Esaki ta ilustra un di e asuntonan mas frustrante di e ultimo decadanan, unda practicamente no tabatin oido pa conseho cu tabata requeri contempla mas leu den futuro, y unda tabata premira loke ta pasando actualmente y lo sigui tambe den e proximo decadanan.

Unda pension pa sector priva a keda?

Mester bisa cu algo mas di 10 aña pasa tabatin atencion pa e problema di enbehecimento y pension, loke a resulta den un ley pa un fondo di pension obligatorio pa sector priva, hustamente pa crea un pension adicional pa empleado. Nos no tin ningun informacion con ta bayendo cu e fondo y ta remarcable cu ni e partido cu e tempo ey a percura pa e ley, ta siquiera menciona esaki. Y e ministro di finanzas, no esun actualmente so, sino en general esun cu ta encarga, lo mester a cumpli cu e ley y nombra un supervisor pa e pension aki, y te awe no tin un instancia nombra. Un falta total di interes di politico pa asunto strategico? Anto den e ambiente aki di ausencia di vision y preocupacion pa futuro, nos mester spera milagro di esnan cu mester prepara nos futuro? Ta e Hulandesnan so ta preocupa pa aumento di edad di pension te 66 aña, of nos politiconan ta lanta for di soño?