Pasadia Briyo di Solo a yega na un acuerdo cu Bright Bakery/Centro di Bario Piedra Plat pa nan uza un localidad gratis temporalmente. Esaki lo alivia tur nan clientenan pasobra lo parti nan den grupo pa asina tur por cuminsa bek pa diahuebs.
Sra. Else van Homelen, directora na Stichting voor Verstandelijk Gehandicapten Aruba (SVGA) a informa Bon Dia cu mañan nan lo informa tur mayor telefonicamente pa splica nan con tur cos ta bay cana. Pues pa diahuebs e clientenan por cuminsa bin bek. “Nos ta hopi contento cu nos ta hayando e ayudo di nan!”
Sra. Homelen ta informa nos cu na Briyo di Solo mes lo tin tres grupo, y dos na Centro di Bario Piedra Plat. Tambe, nan tabata presente den un reunion di Rotary dialuna unda cu lo bay wak con nan tambe por yuda.
Manera conoci, tres localidad a wordo afecta door di un candela algun siman pasa na Pasadia Briyo di Solo, un luga pa cuido di muchanan cu limitacion fisico/mental. Manera nos a informa tambe, nan ta segura pa candela pero seguro lo cubri mastanto e reparacion na e edificio. “Nos materialnan ta hopi bieu pues nos no ta haya mucho placa bek pa inrichting. Pa seguro e ta bal nada, pero pa nos hopi,” sra. Homelen ta splica. Un computer di tres aña por ehempel no ta bal nada mas pa seguro, per pa cumpra un nobo bo meser di casi 2000 florin.
Click akinan pa lesa mas tocante nan storia via nos publicacionnan anterior:
100.000 florin pa drecha daño na Pasadia Briyo di Solo y Apelacion pa yudansa
