Totalmente contra violencia, pero mester por pasa algun di boso poco mep. Por ta si boso sinti cosnan den curpa, algun di boso lo cuminsa actua drechi. Wel, mi a bay wak e debate live y lastimamente mi no tin niun tiki speransa pa nos isla. Curason ta kibra den delaster un pida.

Un tiki laat atrobe, pero ya. E columna ta sali tur dialuna mi hendenan, no culpa mi.

E falta di respet di parti partido AVP e dia di e debate tabata algo inexplicabel shonnan. Mi amiga a bisa mi “Bosa, despues di tur locual a pasa cu e gobierno actual te hasta e lider di partido CURPA a cuminsa mustra manera un bon opcion”. Imagina bo, hende cu tabata wak e na cas tabata sinti incomodo, corda nos cu tabata sinta eyden. Ami cu mi amiga a yega ballroom di Marriott tur entusiasma, bunita bisti manera Tante Janchi cu Tante Sidonia. Nos a cay sinta, e plan tabata pa bay debate y djey bay djodjo un caminda. Pero, despues di a pasa asina un mal rato den tur e mal energia ey, nos a dicidi di bay cas bay drumi.

Grita, haci beheit, kibramento di regla pa haci fanfaria. Pasobra na e porta tabata poni masha bon cu no por a drenta cu nada cu ta representa preferencia politico. Mucho menos yen bandera. E ta un berguensa asina grandi cu KvK ta pone un evento den otro y publico ta falta respet di estado ey. Nan a traha e remix cu a suta riba Facebook, miho nos tur keda keto un rato berdad. Miho nos tur hari pa nos no yora, pasobra e situacion ta tristo. Tur ora mi bin Aruba mi ta bay bek tiki tristo pasobra laga cas atras nunca ta bira mas facil, ni cuanto cos tin ta spera ami eyfo. Pero e abuso y e berguensa cu pueblo ta pasando aden ta algo di otro mundo.

Nan kiermen tur pueblo ta haya e gobierno cu e merece. Pero mi ta nenga di kere cu Aruba merece esaki, mi ta nenga di kere cu un isla asina chikito y luchado tin cu conta cu e representantenan aki. Mi Aruba? Conta cu politiconan cu ta dab pa mustra cu nan ta “hip”? Mi ta nenga di kere cu despues di tanto gastamento di placa den cosnan innecesario nos tin un prome minister cu ta tribi di bisa corda riba esunnan mas vulnerabel durante un debate. Si, tira e debe riba nan lomba, bisa cu ta e motibo ey nos ta unda nos ta. Uza nan como un arma. Y esey no ta pa bisa cu prome Minister Mike Eman tin mal curason, pasobra mi no ta kere esey tampoco. Sino mas bien mi ta pensa cu el a tuma hopi decisionnan “shaky” pa tene the “big boys” happy. Mi ta nenga di kere cu despues di tanto fiesta y fanfaria, awo diripiente nan ta corda riba esunnan den necesidad. Aruba, wak kico a pasa cu Venezuela, wak kico a pasa cu Merca, wak kico ta pasa ora ignorancia ta gana.

Y si vies tabata e actitud di e un parti di e publico durante e debate. Mas vies ainda tabata e actitud di un señora cu tabata sinta front row. Esaki ta un scoop, pasobra camara no a grab’e, pero ami si tabata t’ey. Ora di e break tur hende a sali busca algo di come y algo di bebe. Claro, organisadonan a faya eynan, break tabata cortico, tin hopi hende, tin un solo bar pues ora di ordo cosnan no tabata bay necesariamente lihe. Pero e señora aki, mester bay haci cos di animal y grita e trahadonan dilanti tur hende manera cu ta nan fout. Bo por wak cu e trahadonan ta muchanan young, cu mas sigur ta traha catering part-time pa yuda nan curpa. Y e, pasobra el a bay sinta VIP na Marriot ballroom pa wak un debate e ta kere e ta reina Beatrix pa bin purba di humilia nan y papia malo cu nan pasobra servicio ta slow. Grita ‘Si, ta esaki ta boso Marriott five star cu boso ta gaba cu ne’. Manera cu e hobennan tin parti den e hotel. Mi ta spera e señora ta lesa e columna, mi ta spera e sa cu tur hende cu a presencia su actitud ta hay’e un mal hende. Den su mesun palabranan e di ‘E problema di Aruba ta cu cos ta bay malo y niun hende ta papia’. Wel ata mi ki, bo comportacion tabata bon malo. Bo no tin pakico trata niun hende asina y mucho menos nos hobennan. Nan merece respet tambe. Señora ta rabia? Leuk. Ami tambe, hit me up.