Mientras nos por presencia un avalancha na iniciativa, plan y proyecto di practicamente tur ministerio, ta dificil pa distingui un maneho conhunto cu ta trece tambe claridad den cierto asunto, cu claramente ta competi cu otro o no por tuma lugar na mes momento. Varios proyecto ta topando cu problema cu mester resolve pa por sigui, y no ta mira contesta contundente pa nan. Pregunta ta si tin un gobierno so, o ta cada ministerio riba nan mes. Y cu poco claridad ken ta sali beneficia cu kico.
Un di e proyectonan cu recientemente lo mester a haya un ‘polish’ nobo ta Port City, cu a conoce un presentacion pa atrae inversionista. Cu ta bay logra haya interes pa e inversion total di 500 miyon dollar cu segun gobierno ta necesario, esey tempo lo mustra. Sin embargo, tin varios pregunta cu mester haci. Un di e promernan ta tocante e viabilidad di e proyecto. Mester realiza cu e caracter di e proyecto aki ta haci cu su exito comercial ta depende hopi di un expansion grandi di e base economico di Aruba, principalmente den sector turistico. Ta dificil pa mira e proyecto aki como e impulsor di e actividad economico riba cual e proyecto mes lo prospera. Basicamente ta crea mas acomodacion turistico y mas comercio riba un lugar caro, loke ta posible solamente si ta logra atrae e carteranan grandi di exterior cu awor sa bin Aruba, pero no na e cantidad desea. Nos ta haya e impresion cu e entusiasmo pa e recuperacion rapido di nos economia ta hibando na conclusion robez, esta cu nos ta para na inicio di un era nobo di inversion y expansion grandi den sector turistico, algo cu nos no ta mira sustenta pa ningun informe di ningun instancia internacional cu regularmente ta analiza nos economia.
Si ta haci e tipo di inversion grandi aki, y no ta bin un aumento grandi di turismo, kico ta bay sucede? Nos ta bay mira un canibalizacion di e sector existente? Mesun pregunta por haci tambe pa comercio cu ta flota riba e volumen di consumo cu ta origina den turismo. Nos ta mira, promer y despues di e crisis di Covid, con e exceso di comercio den e area di highrise ta causa problema. Henter e mudanza di comercio pa e area di hotel a causa e salida masivo di comercio for di centro di ciudad. Kico nos ta mira awor? Cu di un banda ta promove un proyecto di comercio y turismo ‘upscale’ riba tereno portuario, mientras cu e colega encarga cu asunto economico ta promove rehabilitacion di centro di Playa. Kico ta e proposito aki? Mester bolbe ripiti e pregunta haci cu cierto frecuencia den e medio aki: cuanto comercio bo kier crea? O ta nos no ta comprende e wega bon: e partido grandi ta tuma na su encargo e proyecto grandi (Port City) mientras cu e partner menor ta haya e garnachinan di e ruina den Playa, a sabiendas cu gobierno no tin placa toch pa hinca den e rehabilitacion ey?
Pa corona obra, e partner junior den e gabinete a hereda e otro dolor di cabez relaciona cu centro di ciudad, cu ta e situacion di parkeer. E entusiasmo di e mandatario envolvi ta diametralmente contrario na e posibilidad di solucion di e problema, pasobra no ta posible please tur hende. Tin decision fuerte pa tuma, y inversion grandi pa haci pa renoba e meternan, motibo pa cual nos no ta mira salida aki.
Unda San Nicolas ta keda?
Na San Nicolas nos ta mira mesun tipo di desaroyo no splica, cu indudablemente ta conduci na contradiccion. Di un banda awor ta vocifera cu henter e zona di refineria ta haya un destino (industrial) nobo. Esey ta parce logico, pero con a para anto cu e plan pa conecta centro di San Nicolas cu lama, pa duna e centro un bida comercial nobo? Esaki lo a conduci na habri un zona na altura di e centro, loke ta crea un situacion nobo, cu hunto cu por ehemplo un puerto di yegada pa un compania crucero realmente por significa un impulso grandi. Kico ta e proposito na e momento aki? Atrobe nos ta mira cu e partner junior ta move pa stimula actividad comercial den centro di San Nicolas, mientras no tin claridad kico esaki ta bay encera y kico no, ademas cu aki tambe gobierno no tin diez placa pa pone e proceso cana… Atrobe ta surgi e pregunta: e partido grandi ta atende asunto grandi, y ta laga par di garnachi pa e partner junior?
Pa bolbe na e proyecto Port City; esaki no ta e promer intento pa usa e area di haf di Playa pa algo hopi bunita y hopi grandi, sin cu realmente e ta convence. Nos no sa si nos mester haya straño of no cu di e gremionan empresarial no ta bin mucho comentario, di manera cu nos no sa unda nan ta para. Por ta cu nan ta pensa den sentido di e expresion Hulandes “baat het niet, dan schaadt het niet”. Es decir, “laga gobierno haci loke nan kier, si resulta algo util, ta bon pa nos, y si e fracasa, ta gobierno por yuda…”
Finalmente, e pregunta pa e partner junior contesta: cuanto tempo ainda ta manda nan bay lidia cu e problemanan menor, y sin placa, mientras e partner grandi ta tene show cu proyecto grandi?
