E tres partido politico principal di Reino Uni a purba di convence votadonan cansa ayera, tur primintiendo cu lo caba cu e saga di Brexit si nan gana eleccion nacional otro luna – pero ofreciendo visionnan hopi diferente di con lo logra esey.
Prome Minister Boris Johnson a bisa cu si partido conservador gana dia 12 di december, e lo pone Parlamento ratifica acuerdo di divorcio cu Union Europeo, y Reino Uni lo bandona e bloc prome cu 31 di januari proximo.
E partido principal den oposicion, Partido di Labor, ta bisa cu lo dura un tiki mas largo – seis luna – pa caba cu mas di tres aña di incertidumbre impulsa pa e decision di votadonan na 2016 pa bandona e Union di 28 pais, despues di mas di cuatro decada di miembresia.
Centro-iskierdista Labor ta bisa cu si e gana, dentro di seis luna lo negocia un acuerdo nobo di divorcio Brexit, cu lo mantene relacion estrecho entre Reino Uni y Union Europeo, y despues tene un referendum nacional riba si lo bandona e bloc riba e terminonan aki, of lo keda den e bloc. Lider di Labor, Jeremy Corbyn no a bisa cua opcion e lo sostene.
Johnson ta insisti, den un carta habri, pa aclara y splica cua ta su plan. Corbyn a bisa cu e plan di trabou pa Brexit ta cla y simpel. El a bisa cu tin rason pa apela na 52% votado cu a opta pa bandona UE y 48% cu kier a keda na 2016.
Corbyn a bisa cu crisis di Brexit mester resolve, pero mester wordo haci democraticamente. Democrata liberal pro UE ta purba pa atrae votadonan leu di partido, cu promesa mas grandi pa elimina Brexit por completo.
Nan a bisa cu nan por pone fin na problema economico. Cu lo impulsa economia y permiti pa gobierno pone otro 50 mil miyon di libra den servicio publico. Actualmente e partido tin solamente 20 di e 650 asiento den parlamento.
46miyon di persona lo vota den eleccion cu 650 asiento di House of Commons den wega. Unabes cu Reino Uni bandona UE, lo tin cu negocia un acuerdo comercial nobo cu e bloc.
Michel Barnier, hefe di negociacion Brexit di UE, a bisa ayera cu negociacion post- Brexit pa un acuerdo di comercio liber cu Reino Uni lo por ta mas dificil cu e negociacionnan cu a tuma luga durante e ultimo tres aña.
