Durante dia di entrega di lista na Censo, Bon Dia Aruba a acerca e 10 partido entregando lista con nan opinion ta riba e partimento di asiento. Pues sigui e ley (Kiesverordening) actual cu ta dicta secuencia of sigui e cambio pa parti asiento segun e cantidad di voto.
E manera di parti asiento aki ta bay contra di e Kiesverordening cu ta na vigor actualmente. Mirando cu ta a base di number riba lista e asientonan ta wordo parti. Sinembargo candidato riba lista di MEP, Dangui Oduber a entrega un proposicion pa cambia e aspecto aki di e ley, pero no a logra pa pasa esaki na tempo pa dia di entrega lista.
Aki bou por lesa e pensamentonan di e partidonan.
MAS
Di parti di MAS, lider di partido Holmo Henriquez ta splica cu e no ta contra pa parti asiento segun cantidad di voto. Pero e ta subraya cu e no lo haci algo contra di e ley.
“Nos partido ta sostene e cambio aki den e Kiesverordening, pero no ta asina cu nos ta kere nos por bay contra ley. Si mester yega na corte ta algo cu no tin sosten di Conseho Electoral. Nos ta prefera pa sigui di acuerdo cu e ley.”
RED
Red Democratico a palabra internamente y tur candidatonan a firma un “Gentlemen’s Agreement” unda cu a stipula cu e persona(nan) cu haya mas voto lo haya derecho na e asiento(nan).
CURPA
Segun lider di partido Christina Lampe, CURPA no tin ningun acuerdo interno pa parti asiento segun cantidad di voto. Pues nan tambe ta sigui e ley vigente.
ABO
Lider di partido Elton Lioe-A-Tjam ta expresa cu no ta solamente e aspecto aki di e Kiesverordening mester wordo cambia. “Den nos partido, ningun hende ta scoge pa number. Y sigur si un di nos candidato yega na mita di e kiesdeler, nan ta haya e asiento.”
PPA/UPP
PPA of UPP tambe a indica cu nan ta sostene e cambio unda e candidatonan cu mas voto, por sinta den parlamento.
MEP
Lider di MEP Evelyn Wever Croes ta expresa: “Pa ley nos ta mara na e number y secuencia di lista, pero nos a palabra internamente den conseho di partido y a dicidi di ehecuta e concepto aki toch.”
POR
POR a firma un acuerdo unda tur candidatonan ta sostene e punto cu si haya asiento ta parti esaki pa e personanan cu a haya mas voto.
RAIZ
Lider di partido Ursell Arends di su banda ta expresa cu e candidato cu mas voto lo representa nan partido den parlamento.
AVP
Candidato riba lista di AVP y actual parlamentario Chris Dammers a comenta cu partido AVP ta contra e cambio den e Kiesverordening. “E ta un ley cu nos por wak cu a crea problema den Reino caba. Por ehempel na Sint Maarten unda cu ta bira un guera pa haya voto y e idealismo di e partido no ta importante mas.”
