Ayera mainta Hoofdstembureau di di Aruba a tene un sesion publico relaciona cu numeracion di listanan di candidatonan di partidonan politico y asignacion di color di e listanan pa eleccion di parlamento dia 6 di december 2024.

Presidente di Hoofdstembureau, Rossi Marchena a splica durante e sesion publico cu contra decision di Hoofdstembureau di dia 8 di november 2024 pa valida of invalida y mantene candidatonan riba listanan politico, no tabatin apelacion den e tempo cu ley ta stipula pa esaki, y pa tal motibo Hoofdstembureau por pasa over na numera e listanan y asigna color.

Manera ta conoci, un total di 11 lista di candidato di partidonan politico lo por participa na eleccion di parlamento dia 6 di december y listanan aki ta: ACCION 21 cu Miguel Mansur como e prome candidato riba e lista; AVP cu Wendrick Cicilia como e prome candidato riba e lista; CURPA cu Eric Ras como e prome candidato riba e lista; FUTURO cu Gerlien Croes como e prome candidato riba e lista; LPR cu Ryçond Santos do Nascimento como prome candidato riba e lista; MAS cu Marisol Tromp como e prome candidato riba e lista; MEP cu Evelyn Wever-Croes como e prome candidato riba e lista; HTC cu Gilbert Webb como e prome candidato riba e lista; PPA cu Otmar Oduber como e prome candidato riba e lista; RAIZ cu Ursell Arends como e prome candidato riba e lista; y partido RED cu Ricardo Croes como e prome candidato riba e lista.

E numeracion di e listanan a tuma luga via trekmento di lot. Lider y/of representante di seis partido tabata presente pa trek lot y haya number y color asigna.

Partido MAS tabata e prome partido cu a trek lot y lider di partido Marisol Tromp a saca number uno y a ser asigna color blauw cla. Pa partido ACCION 21 lider di e partido Miguel Mansur a haya number nuebe y a ser asigna color blauw scur. Pa partido AVP candidato number uno riba e lista Wendrick Cicilia a saca number 11 y AVP a ser asigna color berde.

Geoffrey Wever tabata presente pa saca number di partido FUTURO y a haya number seis y a ser asigna color magenta. Pa partido RAIZ candidato number cinco riba lista, Carlos Guaimo a saca number tres y RAIZ a ser asigna color oranje cla. Y ultimo representante of lider di partido cu tabata presente pa saca number tabata Eric Ras di partido CURPA y a saca number cinco y a ser asigna color biña scur.

Despues cu cada representante of lider di partido cu tabata presente na e sesion a haya sa ki number nan ta haya y ki color ta ser asigna na nan, un di e miembronan di Conseho Electoral di Aruba a saca un number pa cada partido cu no tabatin un representante of lider di partido presente.

Partido MEP a haya number dies y a ser asigna color geel; partido RED a haya number ocho y a ser asigna color blanco; partido HTC a haya number cuater y a ser asigna color ros cla; partido PPA a haya number dos y a ser asigna color oranje; y por ultimo partido LPR a haya number shete y a ser asigna color cora.

Esaki ta e manera cu e partidonan lo aparece riba e stembiljetnan na momento cu ciudadanonan bay eherce nan derecho di voto durante eleccion di parlamento dia 6 di december venidero.

Manera ta conoci, dia 18 di october ultimo Hoofdstembureau di Aruba a ricibi 13 lista di candidato politico pa eleccion parlamentario dia 6 di december 2024. Ocho di e listanan cu a ser entrega mester a haya sosten di firma di votadornan. Cada un di e ocho partido aki tabatin mester di 586 firma di votador, cual ta 1% di votadornan valido di e ultimo eleccion na 2021.

Motibo cu e ocho partido aki mester a haya sosten di 586 firma di votador ta pasobra nan no a logra saca un asiento den Parlamento di Aruba durante e ultimo eleccion di parlamento na aña 2021, of pasobra e partido no a participa na esaki. E sosten den forma di firma por a tuma luga for di 21 di october te cu 29 di october 2026.

Manera ya caba ta conoci, seis di e ocho partido a logra ricibi sosten di 586 votador, cual ta partidonan CURPA, FUTURO, HTC, LPR, PPA y RED. Dos partido no a logra ricibi sosten di 586 votador cu nan tabatin mester y ta trata di lista di partidonan MIA y UPP.

Como cu e lista di candidato di partidonan MIA y UPP no a logra haya e sosten necesario di 586 votador, e dos lista aki ta ser declara invalido pa Hoofdstembuereau di Aruba y consecuentemente e partidonan aki no lo ta participando den eleccion parlamentario dia 6 di december.

Depsues cu dia 9 di september ultimo Gabinete Wever-Croes II a enrega su retiro, pa segundo biaha consecutivo, eleccion parlamentario, cual mester a tuma luga inicialmente na juni 2025, awro ta tuma luga dia 6 di december venidero.

Esaki a trece cun’e cu politiconan cu tabata preparando pa 2025 awor ta haya nan mes mester agilisa nan presentacion y drenta inmediatamente den campaña politico, pa maximisa nan impacto den eleccion.

Un politico hoben cu no a logra concretisa su participacion den eleccion di dia 6 di december ta Leonardo Figaroa di Partido Direccion Politiea (PDP). E pa esaki ta cu e retira di gobierno den september ultimo bira un reto, como por ehemplo, e hecho cu candidatonan cu tabatin na e momento ey riba lista a dicidi di no continua den e caminda di eleccion aki, pa motibo cu nan no ta sinti nan mes bon prepara debi na e corto tempo pa haci campaña.

Politico Otmar Oduber, ken e aña aki a lansa su partido nobo, Plataforma Pais no a logra registra su partido pa eleccion y consecuentemente mester a tuma over un partido ya caba existente, PPA, pa por forma parti di e eleccion venidero.

Algun otro partido tambe a expresa cu factor tempo a hunga rol grandi den e cantidad di candidatonan cu nan tin riba lista pa eleccion di dia 6 di december.

Potretnan: Facebook