Cu meta pa fortalece e cooperacion entre partidonan no-tradicional y mira si ta existi posibilidad pa consolidacion, diahuebs 15 di september den oranan di atardi a tuma luga e prome “Conferencia Uni Pa Aruba” e cual tabata organisa bao iniciativa di partido Accion21.

Den un entrevista na Bon Dia Aruba, Miguel Mansur, lider di partido Accion21 a señala cu nan a invita tur 10 partido di Aruba no-tradicional cu a participa na eleccion di aña 2021, unda cu cinco di nan a confirma nan presencia y nan a presenta diahuebs ultimo den e conferencia aki.

Presente tabata Partido RED Democratico, representa pa Armando Rudy Lampe y Ricardo Croes; di Partido PPA Natalie Geerman y Franklin Bernabela; Rigoberto Sint Jago di partido POR; Michael Williams, Buchi Henriquez y Gisele Sint Jago di Partido Pueblo Prome; y Zoraida Conijn hunto cu Miguel Mansur den representacion di Accion 21.

Di e resto di partidonan, manera UPP, HTC, Curpa, Raiz y MAS, algun di nan a reacciona y otro no. “E idea tabata pa habri un dialogo di con e partidonan por coopera miho, unda cu den eleccion di 2021, 19.575 voto a bay pa partidonan no-tradicional cu no tabata un di e dos partidonan bieu. Proximo eleccion tur sondeo ta mustra cu esey ta bay ta e grupo di votado mas grandi”, Mansur a splica.

Di 19.575 ariba un lista combina lo a saca siete asiento, segun el a expresa. Di dies diferente lista el a reduci na 5 asiento loke ta nifica cu “realmente tin un interes y un beneficio pa nos coopera cu otro, pasobra asina realmente nos ta representa miho e votonan di pueblo”, el a bisa.

E cooperacion por tuma hopi forma, e por ta simpel door di checkers combina, unda algun partido por ta na fabor di un lista combina y otro partido ta na fabor di un union mas profundo. Loke nan a haci ta cuminsa e combersacion unda cu den e conferencia aki, e reunion entre nan a bay hopi bon, manera Mansur a sigura. Tambe el a afirma cu tur esnan presente diahuebs ultimo lo kier sigui reuni, traha y mehora cooperacion.

Den esaki nan a dicidi di reuni cada dos of tres luna.

Accion 21 a saca e notulen y slides cu nan a presenta riba datonan di ultimo eleccion, dos sondeo na maart y despues di un otro sondeo cu nan a haci na augustus, pa wak mas o menos unda e partidonan ta para y unda cosnan a cambia.

Den e reunion, Ricardo Croes di partido RED Democratico a bisa cu den pasado, na aña 2001 y 2009 nan a purba di forma un lista combina cu otro partidonan. El a señala cu si nan a forma un lista combina e tempo ey “nunca ni MEP lo a yega na mayoria absoluto na 2001 y tampoco AVP lo a yega cu mayoria absoluto na 2009. Ami sigur ta wak den e datonan economico cu di 2001 pa 2017 ta e pio periodo en cuanto finanzas publico. Mi ta kere sigur cu nos tin un deber di purba traha hunto y coopera”, el a expresa.

Ademas, el a sigura cu cada partido presente e dia ey kier coopera. Nan tin nan cultura y nan ideologia cu tabata un punto tambe con por wak esnan cu tin mas en comun. Por ehemplo, un sugerencia cu nan a haci ta pa e partidonan presenta e cuatro punto crucial mas importante pa nan cu kier logra y wak unda tin similaridad. E ta considera cu bayendo dilanti nan lo wak un cooperacion cu den pasado a mira entre diferente partidonan.

“Obviamente e lista combina ta keda un opcion riba mesa y kisas algun partido den cooperacion mas estrecho” Mansur a comenta.

Di loke ta trata diferente ideologia, partido Accion21 ta considera como un partido liberal y ta di acuerdo cu matrimonio igualitario. Mansur a splica cu nan ta den proceso di combersacionnan. Di esnan presente den reunion di diahuebs ultimo, Mansur a informa cu un di nan so no a vocifera nan posicion tocante e tema aki y otro tres a keda neutral y bisa cu nan no tin nada den contra.

“Pero esey ta puntonan cu nos tin cu discuti y yega na e momento ey con e lo bay funciona. Pa Accion 21 e principio di igualdad ta un di nos cuatro puntonan cu no ta negociabel y mi ta espera cu e matrimonio pa parehanan di mesun sexo lo wordo a logra prome cu proximo eleccion. Pero independientemente di esey, e parti mas complica aworaki pa nos – y mi ta kere nos sugerencia ta pa den futuro, pa ora di forma un lista por ehemplo, no tin un limite di cuanto partido por bay riba un lista combina. E unico limite ta e 29 hende cu por bay riba e lista y den ki orden nan lo bay.”

E inspiracion pa e conferencia ta bay back na eleccion di 1990 na Nicaragua, unda tur partido cu no tabata sandinista e tempo ey a purba crea un combinacion, pero nan no por a bin cu un plan di partido pa motibo cu e puntonan tabata diverso. Pero na final tur a uni pa bay contra e sandinistanan y nan a sali victorioso.

“Esey ta e inspiracion, di un oposicion cu ta diferente na e oposicion grandi. Ta interesante pa wak cu na Aruba tradicionalmente tabatin un di tres partido grandi, cu tabata partido PPA y di e cinco partidonan cu a bin na reunion, cuater di nan tabata di partido cu a sali di e cuna di PPA bieu di tempo di Juancho Irausquin. Bo ta wak cu e votadonan a dicidi. Por ta cu tin un inspiracion pa bolbe produci di tres of di cuater partido grandi ”, Mansur a bisa.

Sinembargo, mayoria di votadonan di Aruba ta dividi entre e dos partido grandi cu ta AVP y MEP. Den esaki Mansur a enfatisa cu esaki ta un distraccion grandi y e narativa di ta cu e partido berde of geel “mester caba”. Pa esaki tin un otro alternativanan, y “esey ta algo cu mi ta rechasa rotundamente den parlamento, pasobra hopi biaha nos ta hay’e cu bo ta cu MEP of bo ta cu AVP. M’a yega di vota cu oposicion y coalicion den cosnan importante, pero e ideologia ey ta algo cu mester wordo kibra, pasobra e ta destructivo pa nos pais y e ta destructivo pa nos futuro”.

E palabra “politiek verziekt” ta permanece den comunidad. Mansur ta di opinion cu esey ta hopi lamentable. “Basicamente, hende ta ciegamente identifica cu un di e dos partido ey y esey ta haci e cambio cu mas poco poco nos ta desea. E generacionnan nobo ya no ta pega den esey y bo ta wak den un cierto edad bay ariba, den hobennan ainda tin esey pero den un minoria di caso. Por ehemplo, aworaki den nos sondeo mi ta kere cu un tercera parti di Aruba ta un swing voters, 27% ya caba ta mira diferente politiconan y diferente plannan di partido. Ainda e berdad ta cu ta existi e politica di intercambio:vota pa nos y nos ta yuda bo cu algo. Poco poco esey mester caba, pasobra si nos tin un politica di intercambio e sistema ta wordo corumpi prome cu gobierno a sinta”, el a finalisa.