Partidonan di oposicion a entrega carta pa gobierno rectifica presupuesto di aña 2023

Ayera mainta, minister di Finanzas y Cultura, Xiomara Maduro a entrega e nota di fin di aña na Parlamento di Aruba, cual ta contene e cambionan cu ta bin den e ley pa cambia presupuesto di 2022.

El a splica cu conforme e ciclo presupuestario, na momento cu parlamento ta aproba presupuesto, despues ora ta pasa pa implementacion, gobierno ta haci su trabao y tin cambionan financiero cu ta tuma lugar, cu despues nan ta bay back parlamento pa haci e cambionan aki pa refleha e realidad financiero, manera el a sigura.

Di otro banda, parlamentarionan di partido di oposicion, AVP sosteni pa fraccion di MAS y Accion 21, ayera mainta tambe a reuni pa entrega un carta pa parlamento, por medio di e presidente di parlamento Edgar Vrolijk, pa esey yega den man di prome minister Evelyn Wever-Croes y minister di Finanzas, Xiomara Ruiz Maduro segun Mike Eman, lider di partido AVP a expresa.

Den e carta aki e tres fraccion ta pidi pa hala aden e presupuesto 2023, pa motibo cu e presupuesto aki hunto cu e consehonan di Raad van Advies y CAft ta basa riba un BTW cu no ta bin mas. “Kiermen e documentonan cu nos a ricibi den parlamento pa por busca e presupuesto cu supuestamente a wordo entrega na tempo ta un presupuesto cu ta un farsa, pasobra henter e proceso cu parlamento tin encamina pa asina por haci maximo uso di su tarea di controla un presupuesto ta wordo totalmente mina door di e forma con gobierno ta atende cu e tema serio aki,” Eman a sigura.

Di su parti, den reunion publico na parlamento di Aruba, minister Xiomara Maduro a trece dilanti cu desde e momento cu nan a encarga cu presupuesto di aña 2018, “semper nos a bini parlamento y nos a keda dentro di aprobacion cu parlamento a duna nos. Es decir ora nos a bin cu presupuesto complementario manera e cambionan cu ta bay bin, nunca nos a bin pa pidi placa extra di gobierno. Nos a bin pa indica y hasta nos a yega na un surplus na 2019 caminda cu e biaha bo ta pidi mas ta menos, nos ta bin indica cu e fondonan ta y aworaki nos a sigui cu e tendencia caminda den tres aña di tempo nos a baha e deficit di un pais grandemente y nos a entrega presupuesto na ora, despues di cinco aña”, el a indica.

Di loke ta trata e carta cu partidonan opositor a entrega, minister Maduro a señala: “Ora m’a scucha loke nan a bisa di e presupuesto, mi ta ripara cu nan no a ni lesa e presupuesto ainda, nan no a pasa den dje. P’esey pa bo categoris’e asina ey e ta gewoon un tema politico enorme y ta un lastima, pasobra presupuesto ta e ley di mas importante di pais Aruba, pasobra e presupuesto ey no ta un presupuesto ficticio”, minister Maduro a declara.

Ademas, tocante BTW, minister Maduro a bisa cu den presupuesto 2023 e ora ey e ta wordo adapta y e ora ey BBO ta subi cu 1% y ainda den parlamento por haci diferente cambio via un nota di cambio. Aparte di autoridad di parlamento pa nan tambe bin cu amienda, gobierno por entrega un nota di cambio tambe.

“Locual nos a haci ta cu nos a adapta splicacion na locual ta bira e parti di BBO. Raad van Advies, CAft cu a mira e documentacion prome cu gobierno a tuma e decision pa no bay mas pa BTW sino BBO, a duna nan opinion caba riba esey. Pero locual parlamento mes a haya ta e informacion cambia y splicacion di e BBO – y despues ora bin cu plan di belasting 2023, e ora lo caba di duna e splicacion necesario. Pero esey no ta haci e presupuesto irealistico. Ademas e ta mustra nos cu nan no ta serio den nan trabao, pasobra ni un a lesa e presupuesto”, el a bisa.

Eman a indica cu e cifranan cu a utilisa den presupuesto inicialmente cu introduccion di un BTW a bay pa Raad van Advies y CAft y ora nan a duna nan conseho ariba e presupuesto 2023 cu BTW den dje, “awo gobierno a cambia e presupuesto aki mandando e consehonan bieu di Raad van Advies y CAft y no tin conseho riba e presupuesto manera el a wordo entrega na e momentonan aki na parlamento. Esey kiermen cu henter e proceso cu gobierno a encamina aki ta pa tuma henter e parlamento aki den un forma cu no ta cuadra cu e seriedad cu mester na momento cu bo ta trata un presupuesto”, el a sigura.

Segun Eman a enfatisa: “Cu esaki un biaha mas ta haci mofa di e reglanan di mas basico y fundamental di un sistema di control di parlamento riba e presupuesto di [pais Aruba]. Esaki ta pa sigui riba e caminda di friends and family, pasobra CAft a bisa den mas di un ocasion cu tur conseho pa baha huurmento di edificio, pa baha gasto di expertonan externo y baha gasto di practicamente oficina di abogado, no ta wordo sigui simplemente pa continua paga pa friends and family, mientras cu den e presupuesto ta mira cu tur otro hende ta bay wordo castiga, costo di bida ta bay subi mas ”, el a finalisa.