Awe tardi eventualmente formado di gobierno, Evelyn Wever-Croes ta reuni cu gobernador di Aruba, y despues e ta duna su briefing riba e proceso di formacion di gobierno.
Sinembargo ayera mainta durante e prome conferencia di prensa di fraccion nobo di MEP den parlamento, Sra. Wever-Croes a duna un indicacion cu e proceso di formacion di gobierno a bira mas evidente, despues cu diabierna ultimo parlamento den su constelacion nobo a wordo instala.
Pa loke ta e formacion di gobierno mes, el a bisa cu nan ta den e fase di finalisa cu e programa di gobernacion. Tambe el a expresa cu ohala pronto nan por anuncia cu nan ta cla pa firma esey y con e reparticion di cartera ta bay ta.
El a reitera cu manera a informa na gobernador diabierna ultimo, e prome señalnan di e cambio ya caba bo por mira. E señal aki ta uno evidente segun sra. Wever-Croes ora cu nos por mira un parlamento nobo cu ya caba bo por mira e coalicion den parlamento.
Igualmente esaki ta wordo mira den e echo cu tin presidente di parlamento y vice presidente di parlamento den nomber di Guillfred Besaril y Andin Bikker, pues ya ta den man di e coalicion. “Esaki ta e prome paso, e prome step”, el a bisa.
E no kier a bay den e parti di formacion di gobierno ya cu esaki ta otro pechi cu e tin actualmente. Pero mas bien como lider di fraccion el a referi na nan expectativanan y trabou den nos organo legislativo.
El a bisa cu e fraccion nobo di MEP tin hopi meta y hopi deseonan cu nan kier bay logra. Aworaki nan ta concentra riba e fase transitorio den parlamento cu ta esun prome cu nan por yega na e formacion di un gobierno.
