Partidonan Volt y GL/PvdA den Eerste Kamer ta preocupa tocante e tasa di interes halto cu gobierno Hulandes ta imponiendo riba Aruba pa e prestamonan di Covid-19, citando e oposicion di gabinete Wever-Croes pa cu supervision financiero regla den un ley di Reino.

Manera portal online Curasoleño, CuraçaoChronicle ta reporta, memey di debatenan politico general, Eddy Hartog di Volt a expresa su decepcion, describiendo e situacion como “un stap den e direccion incorecto.” Di su banda, Ferd Crone (GL/PvdA) a expresa preocupacionnan similar, cuestionando e necesidad pa un maneho stringente asina.

Hartog varios biaha a haci pregunta tocante e potencial ganashi pa Tesoro si Corsou y Aruba paga e prestamonan back segun a acorda, pero Secretario di Estado pa Impuesto y Autoridad Tributario, Marnix van Rij a nenga di duna un suma specifico.

Tanto Hartog como Crone ta haya cu e maneho di gobierno Hulandes, imponiendo un “interes di castigo” riba e islanan, ta incongruente dentro di Reino. Nan a entrega un mocion solicitando pa gobierno Hulandes adopta un posicion mas “constructivo” pa cu Corsou, Aruba y Sint Maarten, cu no lo conduci na restriccionnan den espacio financiero di e paisnan sea mediante gasto of impuesto. Secretario di Estado Van Rij a pidi senador Hartog pa pospone e mocion mientras cu e negociacionnan ainda ta andando.

Manera Bon Dia Aruba a publica recientemente, Conseho di Minister di Reino (Rijksministerraad, RMR) durante nan reunion diabierna no a duna aprobacion na e plan di gobierno di Aruba, presenta pa prome minister Evelyn Wever-Croes, pa amiendanan den ley di supervision financiero. Na lugar di aproba e propuesta di gobierno di Aruba, RMR duna mandato na Secretario di Estado, Alexandra van Huffelen pa asina e por negocia den nomber di RMR sin cu mester warda te e siguiente reunion di Conseho di Minister di Reino.

Segun prome minister di Aruba, Evelyn Wever-Croes, e negociacion awo ta basa riba tres condicion cu Hulanda a pone.

Condicion 1: Maneho financiero; esaki ta referi, segun nos, na e condicion den e propuesta di ley di Reino di 2022, unda ta amplia riba e texto existente di e ley di Aruba, cu un “mehoracion di e administracion financiero’, en bes di e texto original, cu ta papia solamente di reporta encuanto e estado di asunto (stand van zaken) di e administracion financiero. Pa esaki, ta amplia tambe encuanto e modelo cu ministro encarga cu finanzas mester acorda cu CAft pa e reportahe, tambe pa dicidi cual ta e temanan riba cual lo reporta. Tambe den e reportahe ministro di finanzas di Aruba mester indica di ki manera e recomendacionnan haci pa CAft, y tumando na cuenta tambe eventual recomendacion di Centrale Accountantsdienst y Algemene Rekenkamer, ta keda implementa. E parti di trece dilanti e recomendacionnan ta den e ley existente caba, loke ta nobo ta e obligacion di e ministro encarga pa indica di cual manera ta duna siguimento na e recomendacionnan.

Condicion 2: Gasto di personal; E propuesta di ley di Reino ta pone como criterio cu pa 31 di december 2027 e gastonan total di personal lo ta maximamente 10% di e Producto Interno Bruto (PIB; GDP) di e momento ey. Tambe ta propone cu den presupuesto (na caminda pa 2027) mester tin inclui “medida structural pa por alcansa e norma di gasto di personal na 31 di december 2027). Nos ta supone cu esaki ta loke ta e asunto na cual Promer Ministro ta referi. Punto importante den esaki ta cu pa calcula e norma aki, mester acumula tur gasto di Pais Aruba, mas e alto colegionan di estado (Staten, RvA, Rekenkamer), DOW y fondonan di presupuesto y e gastonan paga pa partnernan externo, directamente o via contrato, tambe gasto di personal di e entidadnan di seguro social (AZV, SVb), subsidio di salario pa ‘Bijzonder Onderwijs’, gasto di personal di ex-empleado publico, incluyendo gasto di VUT y wachtgeld, y pago di pension riba gasto di ‘exploitatierekening’ (‘uitkering bij wijze van pensioen’). Como aclaracion: te awor e LAft y e Protocolnan tabata contempla solamente e gastonan di personal di e ministerionan, loke tabata representa e suma bao di e limite di Afl. 479 miyon (den e protocol 2018). E gastonan total manera tuma na cuenta pa e norma di 10% di GDP ta abarca un suma di riba Afl. 600 miyon den e situacion actual.

Condicion tres: tin di haci cu proyecto ‘PPP’; esaki no a haya un splicacion mas aleu di parti di gobierno. Loke si por bisa ta cu e propuesta di ley di Reino ta contene un capitulo dedica na e tema aki, cu no ta aparece den e ley di Aruba . Eyden tin formula cu Aruba no por haci compromiso nobo di colaboracion ‘publico-priva’ (PPP; red.), a menos cu Conseho di Ministro di Reino aproba un peticion di gobierno di Aruba. CAft mester conseha gobierno di Aruba den esaki y e colaboracionnan publico-priva aki mester aparece riba balans di Aruba su administracion financiero y mester aparece den presupuesto di Aruba.

Por lesa mas di e tema aki riba nos website, BonDia.com.