Partidonan den coalicion MEP, POR, y RED a pidi reunion publico den parlamento pa awe mainta trata e status di minister demisionario Paul Croes. Tambe nan kier trata e 61 miyon florin extra cu e proyecto di hospital lo costa. E reunion lo tuma luga pa 10’or.
Evelyn Wever-Croes: “Partidonan MEP, POR y RED ta tuma integridad hopi na serio, y ta cuminsa cu manda e señal bon cla cu no ta tolera corupcion den gobernacion.” E reunion aki a wordo pidi pa keda trata mas pronto cu ta posibel y ayera presidente di parlamento actual Guillfred Besaril a confirma cu esaki lo bira awe 10’or di mainta.
‘Reunionnan cu no por warda gobierno nobo’
Ayera tambe a tuma luga e traspaso oficial di presidencia di parlamento, cual sr. Besaril a expresa na Bon Dia cu: “Si, e traspaso tabata completo como debe ser.” Sr. Besaril ta un presidente di transicion.
E motibo principal di e escogencia di su persona y sr. Andin Bikker (POR) pa guia Staten den e periodo aki di transicion, ta pa motibo cu nan ta dos persona cu tabata hopi envolvi cu diferente comision cu ta encarga cu e proceso y funcionamento diario di parlamento. “E ta un momento bunita den mi carera como politico y definitivamente un honor na duna mi contribucion den e funcion specifico aki,” e ta bisa Bon Dia.
E ta splica nos tambe cu tin tareanan y reunionnan cu definitivamente no por warda te ora cu tin un gobierno nobo y un constelacion definitivo den Staten. “Y esey ta parti di mi tarea primordial combina cu laga un fundeshi solido pa e coalicion den parlamento por sigui traha riba dje e proximo añanan,” sr. Besaril ta conclui na Bon Dia.
