WILLEMSTAD – Un biaha mas partidonan PAR, MAN y PIN ta subraya e disponibilidad pa Corsou funciona como hub logistico pa ayudo humanitario na Venezuela. Manera ta bon conoci, siman pasa gobierno a tuma e decision como tal, anunciando cu e rol di hub logistico lo ta bou di condicionnan y cu na e momento ey ainda no tabatin peticion concreto.
E partidonan menciona ta aclara cu e condicionnan mas principal ta cu acceso na Venezuela pa por duna e ayudo humanitario mester ser permiti na Venezuela y bou di ningun circunstancia lo no permiti pa e ayudo humanitario ser duna den cuadro (geo)politico. Tampoco e ayudo humanitario lo ser ehecuta door di militar di ningun pais. Pues, Corsou lo no coopera cu ningun accion militar of politico. E punto di salida pa cu ayudo humanitario for di Corsou ta mesun cu organisacionnan internacional.
PAR, MAN y PIN a tuma nota cu varios representantenan di gobierno ayafo pero organisacionnan no-gubernamental tambe a haci peticion pa Corsou fungi como hub logistico. Lo somete tur peticion na un evaluacion cuidadoso teniendo cuenta cu e condicionnan menciona.
Pa locual ta e hub mes, e partidonan ta sali for di e punto di bista cu e facilidadnan lo ser maneha y e ayudo concreto lo ser coordina localmente pa yiu di tera, mientras tur gasto ta pa cuenta di e pais of instancia cu haci uzo di e hub . Mirando cu gobierno no ta dispone di tur e facilidadnan necesario, sector priva lo mester por ofrece algun di e servicio y productonan aki.
Partidonan PAR, MAN y PIN lo sigui mantene comunidad informa y ta sigura cu nos dushi Kòrsou lo keda e zona di pas den e tensionnan regional.
