(AP) — Republicanonan den Congreso ayera a habri un investigacion cu pa largo a priminti riba presidente Joe Biden y su famia, usando e poder di nan mayoria nobo pa exigi informacion di Departamento di Tesoro y ex-ehecutivonan di Twitter mientras nan a prepara caminda pa audiencianan publico.
“Awo cu e Democratanan ya no tin gobernacion di un partido na Washington, supervision y responsabilidad ta na caminda”, Rep. James Comer (riba potret), presidente di e Comite di Supervision di Congreso, a bisa den un declaracion.
E comite lidera pa Republicanonan a manda un serie di carta solicitando informacion financiero di Departamento di Tesoro tocante transaccionnan financiero di miembronan di famia Biden cu tabata marca como actividad sospechoso. E rapportnan aki ta rutina, cu transaccionnan financiero grandi automaticamente marca pa gobierno y no ta evidencia, riba nan mes, di mal conducta.
Legisladornan tambe a solicita testimonio di varios ex-ehecutivo di Twitter kende tabata involucra den e trato di e compania di un storia na october 2020 di the New York Post tocante Hunter Biden, yiu mas chikito di e presidente. Republicanonan ta bisa cu a suprimi e storia aki pa motibonan politico.
Moviendo lihe despues di tuma control di Congreso, Republicanonan ta preparando un encuentro politicamente explosivo cu Cas Blanco cu por bay profundamente den asuntonan di famia di e presidene y duna forma na e campaña 2024 pa Cas Blanco.
Departamento di Tesoro no a duna comentario.
Comer y e otro Republicanonan a cuminsa nan plan pa investiga famia Biden dia despues di logra un mayoria chikito den eleccion na november. E Republicano di Kentucky a bisa reporteronan cu tin “preguntanan preocupante”, specificamente tocante e actividadnan comercial di Hunter Biden y un di e rumannan di e presidente, James Biden, cu ta rekeri investigacion mas profundo.
Investigacionnan Republicano riba famia Biden no ta nada nobo. Legisladornan Republicano y nan personal ta bin analisando mensahe y transaccionnan financiero haya den un laptop cu tabata pertenece na Hunter Biden pa ultimo aña. Pero awo e Republicanonan tin poder pa haci citacion den Congreso, dunando nan autoridad pa exigi testimonio y haci un investigacion hopi mas agresivo.
Republicanonan a discuti emiti citacionnan congresional na entidadnan stranhero cu a haci negoshi cu Hunter Biden, y recientemente a trece aden James Mandolfo, un ex-fiscal federal, pa asisti cu e investigacion como asesor general pa e panel di supervision.
Informacion di impuesto di Hunter Biden y su red comercial den exterior ya ta bao investigacion federal, cu un gran hurado na Delaware scuchando testimonio den lunanan recien. Maske e nunca tabatin un posicion den campaña presidencial ni na Cas Blanco, su miembresia den hunta di un compania di energia Ucraniano y su esfuersonan pa cera acuerdonan na China pa largo a genera duda tocante si el a haci negoshi cu servicio publico di su tata, incluyendo referencianan den su e-mailnan na e “big guy.”
Joe Biden a bisa cu e nunca a papia cu su yiu homber tocante su negoshi den exterior. No tin indicacion cu e investigacion federal ta involucra e presidente di ningun manera.
