Partido RED: No ta mira kico Lopez-Tromp a haci malo, pero lo warda decision di comision

Ayera tardi, minister Rudy Lampe y Parlamentario, Ricardo Croes, a elabora riba partido RED Democratico su posicion tocante e situacion interno di partido POR su solicitud di retiro di minister, Marisol Lopez-Tromp y su efecto den gobernacion.

Den e programa ‘Den Combersacion cu Ricardo Croes’, nan a referi na e programa di gobernacion, y tambe e clausula cu ta referi na e institucion di un comision di meditacion den caso di conflicto den e gobernacion di coalicion. Minister Lampe a bisa cu esaki a wordo aplica pa solicitud di parlamentario Ricardo Croes. Nan a institui e comision cu ya caba ta eherce su funcion, y awor nan ta na spera di un conseho final. Minister Lampe a cualifica e conseho aki como un “veredicto” pa nan di RED Democratico, ya cu nan lo respet’e totalmente.

Nan a laga sa cu a base di e acuerdo di gobernacion y principio di bon gobernacion, no ta permiti pa otro partido mishi den asunto interno di un partido. Na inicio nan a bay di acuerdo pa laga partido POR atende su problema interno. Pero despues di 3 di juni cu a start e problema publicamente, nan no a tende mas di nan situacion interno, sino tur cos via prensa.

Parlamentario Croes a declara cu e mester a atende un reunion di urgencia diabierna, unda a dicidi di haci uzo di e clausula cu el a propone referi na e comision di mediacion. Encuanto e situacion di Sra. Lopez-Tromp mes, e parlamentario a laga sa cu e no tabata bao impresion cu e tabata haciendo un mal trabao. P’esey e no por a spera cu a tuma un decision asina di kita su cartera.

Sinembargo e hecho cu POR no a resolve su propio problema interno, a haci cu nan a dicidi di aplica e clausula di e comision di mediacion den caso di conflicto cu lo por afecta gobernacion.

Den e caso aki parlamentario Croes a bisa gobierno mester mustra uno homogeneo, y no cada minister un gobierno. P’esey nan a considera importante pa e comision di mediacion por encamina e proceso pa trece claridad. E ta haya cu nan investigacion mester ta uno profundo cu por trece dilanti, entre otro dicon e problema a surgi, y asina duna conseho.

Encuanto si fraccion di RED lo vota pro riba un eventual mocion di censura contra Sra. Lopez-Tromp, e matutino aki a haya como contesta for di RED, cu ainda ta den proceso di e conseho cu lo sali for di e comision di mediacion. “RED Democratico lo cumpli cu e acuerdo di gobernacion door di honra e conseho di comision di mediacion. Nos ta keda den espera.”