Dialuna ultimo, partido RED Democratico y su miembronan a tene un conferencia di prensa unda nan a trece dilanti algun puntonan manera e politiconan di Aruba y nan integridad, ademas di esnan cu ta bao investigacion y cu pueblo di Aruba mester scoge bon pa otro eleccion y “no cay den trampa.”

Ricardo Croes a señala cu na Aruba tin politiconan cu den periodo aki a bin dilanti cu “e curashi di pretende cu corupcion ta den tur partido politico, e persona cu a bisa esaki ta e parlamentario cu a saca su asiento den prison, e kiermen cu tur partido politico na Aruba ta corupto y awor ta un parlamentario di partido MEP cu a bin dilanti y pretende cu MEP tin un actitud pro-activo contra corupcion na unda el a bin cu tres punto cu ta ley di financiamento politico, ley di integridad y ley di screenig pa ministernan.”

Segun Croes ta indica, tur e tres ley aki ta iniciativa di partido RED Democratico y cu for di su inicio na 2005 tabatin e idea pa trece e proyectonan ey “nan ta duna e impresion cu di e tres punto pro-activo contra corupcion pero no ta e tres ley ta e tres ex-minister, Besaril Romero cu Briesen cu ta bao di investigacion y un di nan ta basta preta den investigacion cu hasta el a paga back caba y esey ta nifica cu el a admiti y cu el a haci cos cu no mester a haci,” el a bisa.

Igualmente Croes a trece dilanti cu e gobierno aki a dispensa tres di nan minister pa a comete actonan contra ley, entre otro pago di FASE y pago di TPEF segun el a sigura, di minister Dangui Oduber caminda Croes a enfatisa cu el a bay parlamento pa legalisa un comportacion cu de facto tabata un comportacion ilegal.

“E campaña di corupcion aki, cu entre otro, den e parlamento aki tin sinta aworaki, partido MEP a menciona tres minister cu ta den investigacion, partido AVP cu tin un ex-minister y ex-presidente di parlamento cera den KIA, nos tin partido POR cu tambe tin e ex-parlamentario Sr. Howell y ex-minister Sr. Oduber e cual tin hopi curashi di papia di integridad, pero tambe tin Sra Marisol Lopez-Tromp ken practicamente a ser dispensa di un straafrechteling di un investigacion di parti di OM y laga nos corda di e minister sin integridad, Ursell Arends ken a pidi dispensa lubidando tur e accidentenan cu morto cometi den e pais aki pa chauffeurnan cu ta core auto bao influencia di alcohol, anto a bo ta minister di Integridad y partido RED Democratico no ta den ni un caso bao investigacion ,” Croes a declara.

P’esey el a haci e peticion “pa no cay den trampa y vota pa hendenan cu nan ta haci ta enrikece nan mes, nada otro,” y vota pa politiconan cu tin e pais na pecho y cu a demostra esaki caba “tur e campaña cu tabatin contra RED Democratico a duna su fruto, nos a bay cas, pero awe e fiesta a continua.”

Armando “Rudy” Lampe ken tambe ta miembro di e partido aki a trece dilanti cu pa loke ta trata e caso di SKOA y e werksternan caminda “e werksternan a ser engaña y SKOA a ser engaña, pais Aruba a perde pasobra realmente a usa placa contra ley y nos ta wak e mesun modus operandi, wak e ultimo ley cu a ser manda na januari na parlamento door di Evelyn Wever-Croes pa cambia nos ley di eleccion, Raad Van Advies ta bisa cu a presenta esey pa cambio mientras cu tin otro cosnan esencial pa cambia y dicon nan ta bin cu e cambio di ley electoral aworaki unda cu no tin control riba ken ta e votadonan, kico tin eytras? Ken ta bay vota? Kiermen nos mester ta alerta di kico ta bay pasa den eleccion aki pasobra nos tin cu wak pakico aworaki nan ta manda un ley di eleccion pa cambio anto e esencia mes boso no a touch, manera Raad van Advies a bisa, wak e esencia, por a cambia e ley di eleccion unda esnan cu ta haya mas voto ta drenta parlamento,” el a comenta.

El a referi na Sint Maarten unda varios miembro di parlamento aworaki no ta lider di partido pa motibo cu nan a haya mas voto cu e lider “pero esey si Evelyn Wever-Croes no kier cambia pasobra esey ta e poder di famia Croes, a bo ta dicidi ken ta bin di un, dos of tres , ken ta bay parlamento, ken ta comporta su mes bon ta haya un luga mas halto, esey ta e poder cu tin.”

Segun e tambe a sigura, famia Eman tambe a haya e chens pa cambia e ley aki pero nan tampoco a cambi’e, den e di dos punto di e ley di eleccion pa cambia ta papia di Arubianonan na Hulanda y na stranhero por vota, pakico bo na ta cambi’e manera tur otro paisnan a haci’e? Aworaki bo tin chens. Pasobra bo no por manipula nan facilmente ora cu Arubiano ta na exterior ta mas critico, pakico bo no ta cambi’e pasobra eynan ta e corupcion cu tin, nos ta sigui usa placa di pueblo pasobra e asunto di SKOA no ta nada otro cu pa haya fondo, tur dos partido a gaña djis pa haya voto, Lampe a sigura.