Diaranson ultimo partido RED Democratico a convoca un conferencia di prensa urgente pa ayera diabierna pa asina ey nan por trece un preocupacion grandi dilanti cu tin di haber cu presupuesto pa pais Aruba pa aña 2023 cu recientemente a wordo aproba na Parlamento.

Dilanti di oficina di Gobernador di Aruba su excelencia Alfonso Boekhoudt, Ricardo Croes miembro di e partido aki a señala cu tratamento di presupuesto pa aña 2023 cu a wordo trata dianan pasa tin un proceso hancra den Constitucion igualmente cu tur ley, e ta asina cu e presupuesto aki tin cu pasa Directie Wetgeving en Juridische Zaken y tambe tin cu bay pa Raad van Advies caminda nan tin cu duna su conseho, pa despues esaki wordo trata den parlamento tanto di parti di gobierno como di parlamento hunto pa tin participacion y satisface exigencianan den e Constitucion pa tratamento di leynan cu ta conta pa tur hende.

E presupuesto di e leynan aki ta uno cu ta yama Landsverordening y segun Croes a bisa ayera, den e tratamento di e presupuesto aki gobierno a presenta un nota di cambio, esey ta nifica cu e presupuesto mester bay Raad van Advies pa haya conseho, pa despues e wordo trata den parlamento atrobe y “esaki no a tuma luga, esaki ta algo contra nos constitucion y despues cu esaki tuma luga ta resta solamente un persona cu te ainda mester firma of no pa aproba e presupuesto aki, y esey ta gobernador di pais Aruba”, el a bisa.

Den pasado, gobernador a yega di nenga di firma un presupuesto y tabatin yen di manifestacion unda ex-prome minister Mike Eman a bay cu welga di hamber como medida di resistencia.

Awor, tin un situacion di nota di cambio cu a wordo presenta pero no a manda e presupuesto bek pa Raad van Advies pa cumpli cu lo cual ta e Constitucion “esaki no ta prome biaha cu esaki ta tuma luga, partido RED Democratico a conclui cu e mesun actor cu a haci esaki den pasado ta e mesun actor cu aworaki ta tratando na parlamento e presupuesto anto esey ta algo cu no por wordo acepta, nos ta desea pa Sr. Gobernador pone atencion riba esaki, defende y para pa nos constitucion y ni un momento permiti pa algo di esaki tuma luga”, Croes a sigura.

Di su parti, Armando ‘Rudy’ Lampe cu tambe ta miembro di e partido aki a menciona cu e conferencia aki tabata pa duna sosten publico na e institucion di gobernador, “pa e para firme pa principio di bon gobernacion, den su opinion, e institucion di gobernador ta e ultimo refugio cu pais Aruba tin pa para pa bon gobernacion y loke a sucede ta un acto di mal gobernacion, historia ta ripiti y nos no kier pa e ripiti manera den pasado”, Lampe a bisa.

Segun el a conta, e mesun partido MEP bao di gobierno absoluto na aña 2006 “pa mesun asunto di BBO a haci e mesun cos, nan a presenta un nota van wijziging ora di aproba e ley di BBO y nan a argumenta cu constitucion ta bisa cu despues di scucha di Raad van Advies cu no ta para na e ‘het leasen van een advies di Raad van Advies”.

“Nan a keda sin manda e nota van wijziging cu cambionan drastico pa loke ta e ley di BBO na Raad van Advies, nos e ora ey a manda un carta fin di december pa minister di Hulanda cu ta regarda asuntonan di Aruba y bis’e cu e ley di BBO a wordo aproba anti constitucionalmente, Raad van Advies a drenta den un disputa e tempo ey y nan a pidi un conseho di staats rechtsgeleerde pa bin cu un conseho riba e discusion aki”, Lampe a sigura.

E conseho ey a drenta dia 20 di februari di 2007 y el a bin na parlamento dia 7 di maart di 2007 “e conseho aki ta un capitulo importante den nos historia constitucional y nos no tin duda cu Sr. Gobernador y su staf huridico ta na haltura di e conseho aki y tur hende por wak’e pasobra e ta publico, bay busca e jaarverslag Raad van Advies 2006-2007 anto bo ta haya 14 pagina di e conseho ey”, el a declara.

E conseho ey a conclui cu mester tin un conseho escrito “pa motibo cu horen van de Raad van Advies no kiermen manera partido MEP a bisa cu ta horen y den e caso di e ley di BBO un hurista a bisa cu “na e tempo ey e partido di MEP a manipula un asunto serio y cu e nota van wijziging no por bisa mi no tin tempo, mi no por mand’e pa Raad van Advies, tambe e hurista den e tempo ey a comenta cu un bes cu gobernador a firma y a publica e ley, e ta drenta na vigor y nos tur mester cumpli cu e ley”, Lampe a enfatisa.

Aworaki Lampe a sigura cu nan no por a scapa cu esaki, pa motibo cu gobernador actual si tin e conseho aki “e ora ey no por keda otro na nos gobernador pa bisa nos no ta firma y publica e Landsverordening di presupuesto 2023 y den extremo por present’e na Conseho di Minister di Reino y nan ta mand’e pa Raad van Staten cu ta duna conseho y despues e ta bay na Koniklijk besluit cu ta destrui e Landsverordening Presupuesto 2023”.

Den caso cu esey no sucede, cu gobernador firma y publica, “esaki lo ta un mancha riba un institucion asina respeta manera institucion di gobernador pa motibo cu gobernador ta para garante di bon gobernacion y e conseho di e hurista ta hopi cla den esaki cu no por bolbe ripiti pasobra e ora si Aruba ta bira un republica di banana, p’esey nos ta akinan pasobra nos kier duna sosten publico pa bisa gobernador pa para firme, a bo ta nos ultimo recurso, a bo ta nos garante pa bon gobernacion y cu e presupuesto 2023 aki no por wordo firma y no por wordo publica”, el a finalisa.