Diamars ultimo, miembronan di Partido RED Democratico, Ricardo Croes y Armando ‘Rudy’ Lampe a tene un conferencia di prensa pa trece dilanti nan punto di bista pa loke ta trata henter e situacion cu ta tumando luga cu helicopter di Cuerpo Policial di Aruba na unda na e momentonan aki, director di e compania cu ta doño di helicopter ta deteni na Merca pa narcotrafico.
Pa esaki, Croes a bisa cu e tema aki a haya reaccion di diferente parlamentario, ministernan y hasta Cuerpo di Polis di mes conhuntamente cu e minister encarga cu Husticia, Rocco Tjon, ken Croes a sigura cu “tabata solamente pa defende e acuerdo aki cu nan a renoba y pa defende e acuerdo cu nan a firma originalmente.”
Pa partido RED Democratico segun Croes a menciona, den su programa di gobernacion nan no ta sostene e helicopter pa diferente motibo “awendia tin tecnologia mas moderno, mas eficiente, mas economico cu ta stipula den presupuesto pa haci esey, ni un momento partido RED Democratico tabata di acuerdo cu helicopter y Kustwatch tambe a ofrece su helicopter, kiermen no tabatin ni un necesidad y tambe tabatin otro companianan cu a participa den e destaho cu tabatin ofertanan mas miho cu esun di Colombia, pero mescos cu otro proyectonan como esun di Watty Vos Boulevard cu tambe otro companianan Europeo a gana y toch, gobierno di AVP e tempo ey y e biaha aki gobierno di MEP ta dicidi di buta e miho oferta cu ta conveni na e pais, ” el a bisa.
Den tempo ey, minister di Husticia Andin Bikker ta esun cu a haci e acuerdo aki y a sinta y firma cu Carlos Restrepo manera varios potret ta mustra “pero segun Sr. Tjon e no ta e doño, ta djis un halto ehecutivo y segun tur medio di prensa Colombiano ta un accionista y esey ta nifica cu e ta un di e doñonan tambe, e pregunta ta: dicon gobierno a dicidi di buta oferta di otro compania cu tabata miho pa bay den acuerdo cu e compania aki? di dos pregunta ta: di tur e oficina di abogado di e pais aki, e unico cu por a representa e compania aki tabata e compania cu Sr. Bikker tabata participa na dje, nos kier papia di integridad y transparencia, pero esaki no ta integridad ni transparencia,” Croes a expresa.
Tambe minister Tjon a sigura cu e ta bay parlamento pa un reunion y asina duna un splicacion tocante e controversia aki “pero no tin ni un reunion publico den parlamento pa parlamentarionan haci pregunta ni pa pueblo por wak de facto kico ta e minister ta bay splica, dicon minister no a bin den un rueda di prensa y splica tur cos of un reunion publico y usa tur documentacion? Esey ta transparencia.”
Pa Rudy Lampe, esaki ta un forma di proceder “cu tanto partido MEP como AVP ta haci mescos, den e caso di helicopter, tabatin un destaho y un compania Europeo a sali cu e miho oferta y toch a hala esey un banda y a bay pa deal cu un compania Colombiano direct, pakico? No pa sirbi interes di Aruba sino pa sirbi otro interes y awor e berdad ta Sali na cla, ta ki interes ta ser sirbi eynan?”
E modus operandi ey y di esnan cu a forma partido POR manera Lampe ta señala, ta bin di partido AVP y MEP na unda tabatin ex-integrantenan di e dos partido aki, “kiermen e mesun forma di proceder pa sirbi otro interes, wak e discusion cu tin aworaki tocante RAft cu ta e ley di Reino pa control financiero di Aruba, unda tin placa mester tin control externo sino bo no tin nad’i sconde no tin miedo pa tin control di afo.”
Director di departamento di relacionnan di Reino a declara den Parlamento Hulandes cu di berdad si yega na un acuerdo pa e ley local (LAft) 1 cu januari, ta bay tin un tempo di dos aña pa sigui negocia riba e ley financiero na nivel di Reino “esey ta MEP su interes, ban rek’e Gabinete Wever-Croes II ta termina aki dos aña, laga un otro gobierno bin haya e batata cayente aki y despues ora nan tuma e decision pa bay di acuerdo, nos ta mobilisa pueblo, nan a traiciona Betico anto eynan MEP ta bolbe bin back, kiermen unico cos cu nan tin ta interes personal y di partido, nan no ta worry cu interes di pueblo.” Lampe a comenta.
Pa e motibonan aki, Lampe ta señala cu nan ta sigui den e lucha. Partido RED Democratico ta convoca pa un reunion di miembronan dia 1 di october proximo di manera presencial y tambe virtual, “nos ta un partido serio, nos ta un partido cu tin e interes general y e placa di pueblo nos sa di defende, kiermen nos ta un alternativa y esey ta duna nos animo pa sigui lucha,” el a finalisa.
