Ayera mainta, partido RED Democratico a tene un conferencia di prensa pa asina trece algun puntonan dilanti mirando cu campaña electoral a cuminsa na unda nan ta cuestiona e caida di gobierno di Gabinete Wever-Croes II y tambe a sigura cu normanan di bon gobernacion ta indispensabel pa aplica ora ta goberna un pais.

Den esaki, Ricardo Croes miembro di partido a señala cu transparencia, integridad, responsabilidad, comptabilidad pa actonan, inclusion y tur e palabranan aki mester ta participe na momento cu ta gobernando un pais.

“Integridad pa e gobierno di MEP, ta sigur cu no ta existi ni den nan woordenboek, transparencia no ta di papia mes, ta dos palabranan cu e hendenan aki no tin ni un respet. Gañamento si, e ta norma number un di nos prome minister demisionario, e ta gaña y e ta lubida.” Croes a sigura.

Pa partido RED Democratico e caida di gobierno aki no tabata un sorpresa, nan tabata spera for di masha rato “e ta practicamente e modus operandi di Evelyn Wever-Croes.”

Den su opinion, Croes ta expresa cu partidonan chikito no ta wanta presion y esaki ta e modo di partidonan grandi, unda nan kier un mandato absoluto y esun di mas grandi ya caba a mustra kico nan por haci cune.

“Palabra stabilidad a perde tur balor den boca di prome minister. Stabiel pe simplemente ta pa manda gobierno cas strategicamente, kibra su partner chikito den coalicion, boicoti’e tur manera. Nos a biba esaki den carni y weso, con nos a wordo boicotia cu manifestacionnan mientras cu na e momento aki, minister di Educacion, Sr Endy Croes ta pronkia cu Sr. Lampe su trabou y no a haci net net nada,” Croes a bisa.

El a compara e caida di gobierno anterior cu tabata pa motibo di ex-vicepresidente di parlamento Sr. Allan Howell acusa di corupcion den caso penal Diamante y awor den e caso aki, Croes ta puntra dicon prome minister no a haci mescos ora a haya sa cu ex-minister plenipotenciario Guilfred Besaril tabata envolvi den otro caso penal?

Croes a dirigi un mensahe na votadonan “bo tin cu lanta for di soño pueblo, bo tin cu vota responsabel, consciente y sabi, pasobra bo voto ta un arma poderoso,” Croes a sigura.

Ademas el a trece dilanti cu delaster partido politico, cu excepcion di partido CURPA, a core campaña politico cu cannabis pa economia pero na final di dia nada a ser legalisa “nan a legalisa un pochi chikito di CBD oil y nan a dun’e na nan campañado, esey nan a haci y a bo keto bay cay den trampa cu ta Ricardo ta esun cu a bay boicotia legalisacion di cannabis?”

Tambe, a bin dilanti e promesa cu ta haci di habri refineria cada 4 aña, “pero e aña aki nos tin un cos nobo, minister Glenbert Croes awo el a haya petroleo mes, awor nan ta bay bora, saca petroleo cu gas mes. Politiconan y gobernantenan integro, visionario, cumplido di palabra no a habri refineria, pero awor nos ta bay saca petrolio.”

Pa loke ta trata eleccion, Croes a bisa cu nan ta di acuerdo pa traha cu partido AVP “Si Benny Sevinger no ta riba e lista y Mike Eman, aworaki Benny a baha abou y mucho cos no a cambia, pasobra e yiu muhe a subi. Aparentemente nos ta hereda posicion politico tambe akinan na Aruba, akinan tambe papa t’ey kiermen fiesta ta bay sigui.”

Pa nan, e posicion di RED Democratico nunca a cambia, Croes a bisa cu nan semper a boga pa un union den partidonan chikito, entre otro pa evita restzetel “cu cada rato atrobe e ta duna dos asiento na partido MEP y dos asiento na partido AVP, cu tur e consecuencianan cu ta bini. Cada rato bo ta tende nan cu nan mayoria den asiento cu partidonan chikito no por coy partido chikito, pero ta partido MEP a tira gobierno abou dos biaha caba.”

Si eleccion lo resulta cu nan mester cera coalicion sea cu MEP of cu AVP, Croes a bisa cu partido RED Democratico lo enfoca riba partidonan chikito, pa partidonan chikito habri wowo y bini hunto mescos cu na eleccion ya caba tabatin tres partido cu por a forma un bloki caba y asina mustra e poder di partidonan chikito.

“A nos no ta premira pa sinta cu ni AVP ni cu MEP, nos no ta desea ni AVP ni MEP den gobernacion mas, ta basta. Pueblo vota consciente, nos tin hopi partido chikito excelente riba nan, e pais aki mester un otro oportunidad.” Croes ta sigura.

Ta berdad cu den mesun partidonan chikito tin diferencia pa nan deal cu otro, pa esaki, Croes ta comenta cu union ta bin solamente ora tur hende buta orguyo un banda, buta cabes duro un banda “esaki ta e mesun problema cu ta hiba cada biaha cu e partidonan grandi ta sinti nan cu e poder ey y nan ta haya rason. Si e mentalidad ey no cambia, nos ta bay haya un tiki di e mesun cos.”

For di algun tempo caba, nan a cuminsa reuni cu diferente hende pa subi lista riba partido Red Democratico “pero tur hende sa cu e no ta facil akinan na Aruba pa bringa cu e dos partido grandi ey, hopi hende tin miedo di represalia pa motibo di e trabounan cu nan tin y asina cu nan join, entre otro, partido RED, nan ta haya una persecucion.” Croes a bisa.

Di su parti, Armando (Rudy) Lampe a sigura cu nan a sinta cu tur partido chikito, cu excepcion di esun di Otmar Oduber, manera nan ta haciele den tur eleccion, segun el a señala. “E resultado ta excepcional.”

Un di nan punto ta pa e proximo gobierno cambia e kiesverordening pa motibo cu aworaki e restzetel ta bay pa e partidonan grandi. Pero mester cambia e ley electoral cu si e tin por lo menos e 75% di kiesdeler e tin derecho riba e restzetel, aworaki si tin 99.9% di e kiesdeler, ta bay pa e otronan.

Mescos cu e cambio cu Arubiano bibando na stranhero mester tin derecho pa vota manera tur otro pais tine y esey ta e puntonan cardinal cu e partido aki ta considera cu otro gobierno mester tene na cuenta.

Lampe a finalisa cu prome minister a sigura dialuna ultimo cu Raiz a kibra un acuerdo di gobernacion, “un acuerdo di gobernacion ta sagrado, pero Min Pres a kibra su palabra, kibra acuerdo di gobernacion cu partido RED y te na ultimo tabata gaña riba e punto ey, keda sin cumpli un acuerdo di gobernacion y despues ora nos a bay Gobernador y mustra cu nos no tin confiansa mas den Min Pres por escrito cu nos a mustra na Gobernador, e gobierno a cay pa algo otro.”