Partido Raiz ta indica cu ta apoya igualdad despues di tuma nota di sentencia di HOF

Ayera atardi den un comunicado riba nan Facebook Page, Plataforma Raiz a informa cu nan tuma nota di e sentencia di Hof y nan ta subraya nan posicion pa sostene derecho igual na Aruba.

Den e comunicado ta indica cu “Raiz semper a para pa derecho igual pa tur ciudadano, incluso e derecho pa union. Tanto nos parlamentarionan como ministernan ta traha activamente pa un sociedad inclusivo. Derecho igual pa un miho Aruba!”, ta señala.

“Un sociedad inclusivo ta un sociedad cu ta para pa derechonan igual”, tambe a agrega.

Na 2017 Partido Raiz a hancra inclusion y derechonan igual den su principionan, na juni di e ana aki Raiz a uni cu partido Accion21 y MAS pa yega na un ley di iniciativa pa matrimonio entre pareha di e mesun sexo.

Den esaki, ministerraad a bay di acuerdo pa introduci cambio den Codigo Civil pa duna mas derecho na parehanan den union civil, pero esun cu por haci e cambio ey mester ta Parlamento di Aruba.

Manera a bira conoci, par di dianan pasa Hof a dicta sentencia cu matrimonio entre pareha di mesun sexo por ta posibel na Aruba y na Corsou pero tambe ta conoci cu e sentencia aki no tin consecuencia pa duna pareha di mesun sexo e posibilidad por pidi pa adoptacion di un mucha of tampoco ta duna derecho pa un casa di un matrimonio di mesun sexo pidi adoptacion di e yiu di su casa.

Na Aruba ta trata di un caso cu Fundacion Orguyo y un pareha di dos hende muhe a entama contra pais Aruba. Fundacion Orguyo pa algun tempo caba ta vocifera nan lucha pa igualdad completo pa e comunidad LGBTIQ+. Esaki sin duda ta un logro pa e fundacion y e comunidad.

Segun e comunicado oficial ta indica, Corte Europeo pa Derecho Humano na varios ocasion a dicidi cu e Tratado Europeo di Derecho Humano (Tratado Europeo pa Proteccion di Derechonan Humano y Libertadnan Fundamental) ta permiti cu paisnan por stipula cu unicamente parehanan di sexo diferente por casa cu otro.

Corte Comun no ta considera su mes liber pa husga di otro manera cu Corte Europeo a haci pa cu esaki.

Ta crucial den e consideracionnan di Corte Europeo cu e Tratado Europeo ta inclui un disposicion den cua ta hancra e matrimonio tradicional entre personanan di sexo diferente. Corte Europeo a husga cu mester aplica e prohibicion di discriminacion cu ta contene den e Tratado Europeo den estrecho coherencia cu e disposicion aki.