Despues cu algun medio di comunicacion local a circula e rumor cu actual minister demisionario di Asunto Economico, Comunicacion y Desaroyo Sostenible, Geoffrey Wever lo ta bandonando e partido pa uni cu Gerlien Croes den e partido nobo Futuro, Raiz a bin dilanti cu un “fact check” pa desmenti esaki.
Ta parce cu e rumornan a cuminsa pa motibo di un potret cu Gerlien Croes, kende diadomingo ultimo a lansa su partido nobo, Futuro, a post riba rednan social despues di apertura di Aña Parlamentario. Riba e potret por a mira Croes cu Wever, acompaña pa un frase celebrando nan amistad y relacion como colega den ambito politico di Aruba. Esaki a pone cu algun medio di comunicacion local a circula e rumor cu Wever lo bandona Raiz pa uni Futuro.
Sinembargo, partido Raiz a post riba nan pagina di Facebook un fact check, bisando: “Liderazgo di Raiz y Geoffrey Wever ta desmenti e rumor aki. Informacion oficial di candidatonan ta wordo comunica door di partido.”
Ademas, Bon Dia Aruba a tuma contacto cu lider di Raiz, Ursell Arends, kende tambe a desmenti e rumor.
