Partido Raiz: “Nos kier garantisa integridad den tur e proceso y esaki ta algo cu comunidad di Aruba tambe kier wak”

Partido Raiz a tene un conferencia di prensa ayera mainta pa asina informa tocante e ultimo posicion cu nan como partido di coalicion ta bin tumando den ultimo simannan pa “cambia politica” manera lider di partido Ursell Arends a bisa.

Arends a trece dilanti cu ora ta papia di oportunidad igual den sistemanan husto, ta na unda nan mester a yega na e posicion cu nan mester a tuma, ora ta trata di cambionan abrupto cu a tuma luga pa loke ta trata e sistema di otorgamento di permiso y traspaso di taxi.

“Esakinan ta puntonan cardinal pa loke ta trata e principio di nos plataforma di e cual cada un di nos ta para pa esakinan,” el a bisa.

Nan tambe tabatin conocemento cu na momento nan a cuminsa haci e cambionan ey, cu nan ta bay touch e adernan principal di loke ta politica tradicional y esaki lo bin cu resistencia, “awe nos ta wak cu pa haci cambionan e ta bay rekeri determinacion pa sigui pusha e cambionan aki y por tuma luga mirando cu nan ta sirbi interes general.”

Siman pasa a tuma luga na Parlamento di Aruba un reunion den cual minister Arends a defende su maneho, particularmente riba traspaso di permiso di taxi, pa esaki, minister Arends a declara cu e parlamentario di partido MEP, Alvin Molina a sigura cu “Integridad no mester ta e meta” na unda el a contesta cu “mi kier a bisa cu pa nos tur akinan sinta y sigur como minister di Integridad, integridad ta e meta, a nos kier garantisa integridad den tur e proceso pa loke ta trata con gobierno ta coopera y esaki ta algo cu comunidad di Aruba tambe kier wak,”

Di su parti, Carlos Guiamo ken ta fungi como consehero di minister Arends a papia tocante algun punto cu ta ehecucion cu tin di haber cu funcionamento di democracia.

“Pa prome, ningun democracia por funciona optimalmente si no tin suficiente transparencia, si pueblo no tin acceso na informacion gubernamental. Pa trece un cambio den esaki y yega na un standard nobo den transparencia gubernamental, for di ministerio a lansa e website Publico.aw,” Guiamo a señala.

Den su opinion, el a sigura cu esaki ta pa tin mas transparencia di loke ta trata informacion gubernamental tanto di Ministerio di Integridad, Transporte, Medio Ambiente y Asuntonan di Adulto Mayor como di Ministerio di Asuntonan Economico, Comunicacion y Desaroyo Sostenibel di Geoffrey Wever ken tambe a uni na website aki pa loke ta gastonan di personal, documentonan di maneho y rapportnan.