Otro partido cu tambe recientemente a publica di plan di partido ta partido RAIZ. E “perspectivanan” di partido RAIZ ta inclui 22 punto total cu ta inclui e tema di finanzas, economia, turismo, bienestar di animalnan, adultonan mayor, naturalesa, entre otro. Den e prome punto ta trata “Economia y Finanzas cu Dignidad (costo di bida)”.
Partido RAIZ ta enfatisa cu e meta economico di pais Aruba mester ta pa sigura cu tur hende por hiba un bida digno. Den esaki e partido a señala tres pilar social principal cu ta forma e principio di dignidad economico.
Prome pilar cu e partido ta menciona ta igualdad. Segun RAIZ cada trahado/ciudadano mester por cuida pa su famia y gosa debidamente di e momentonan importante di bida, manera cria yiu, sin tin miedo pa inseguridad financiero. Esaki, nan remarca, ta inclui accesibilidad sin distincion na cuido medico, educacion, y un salario digno
Di dos pilar social ta oportunidad. Partido RAIZ a enfatisa cu tur hende mester tin e oportunidad pa persigui su potencial maximo y haya sentido di bida, sin importa su situacion social of economico. Esaki, nan señala, ta causa cu mester duna hende e chens pa un di dos oportunidad y educacion, y kibra bareranan manera discriminacion y pobresa cu ta stroba hende pa logra su potencial completo.
Di tres y ultimo pilar ta participacion liber. E partido ta resalta cu tur hende mester por contribui na e economia sin ta someti na abusonan of ser explota. Nan ta subraya cu trahadornan tin derecho riba proteccion contra practica laboral inhusto, consumidor mester proteccion contra abuso, comercio mester tin garantia di un ‘level playing field’ contra competencia di exterior.
Partido RAIZ ta resalta e necesidad pa un economia nobo. Un aspecto importante den esaki ta oportunidad igual. E partido ta indica cu un gobierno transparente ta sigura oportunidad igual pa tur hende. Nan ta resalta cu transparencia pa medio di tecnologia y cu sistema innovativo ta e forma con comunidad por monitor, controla y sigura su mes cu gobierno ta reparti recursonan publico na un forma husto y balansa.
Otro aspecto ta trata cambio climatico. RAIZ a splica cu e lucha pa diversifica economia di Aruba a cuminsa desde Status Aparte na momento cu e refineria di Lago a cera y den tur e añanan aki esfuersonan pa logra yega na un segundo pilar economico ainda no a duna resultado.
E partido ta enfatisa cu diversificacion ta necesario y lo mester sigui haci esfuerso pa logra esaki, pero pa RAIZ un segundo pilar economico no ta e unico forma pa sigura e economia di pais Aruba. E partido a subraya cu e unico pilar economico actual ta sumamente delicado y fragil pa impactonan di cambio climatico.
RAIZ kier duna prioridad na proyectonan cu tin como meta pa fortalece y proteha e pilar aki y crea un segundo pilar economico pa proteha tur loke a logra te cu awor. Nan ta remarca cu gobierno ta e prome yama pa inverti fondonan publico den proyectonan cu lo sigura cu e economia lo por sobrevivi golpinan fuerte cu inevitablemente e isla lo sufri pa motibo di cambio climatico.
RAIZ ta propone pa desaroya tres sector cardinal pa fortalece e economia di pais Aruba. Un di e secotrnan aki ta sector primario. E partido ta señala cu ministerio di Naturalesa a haci un esfuerso grandi pa stimula sector primario y den 3 aña a logra varios cambio den e sector aki.
Nan ta enfatisa cu mester sigui amplia y fortifica e sector aki como parti di proyecto dirigi riba ‘food security’ den un mundo cada bes mas insigur, y caminda prijs di cuminda na Aruba ta wordo determina pafo di Aruba.
Otro sector ta e orange economy. E sector di industria creativo, partido RAIZ ta splica, tin hopi potencial pa reforsa e industria turistico. Nan ta subraya cu gobierno tin tur instrumento y fondo necesario pa por desaroya e sector aki di forma cu e por integra mas rapido den e producto turistico.
Y di tres sector cardinal cu RAIZ ta propone pa desaroya ta silver economy. E partido ta splica cu adultonan mayor tin necesidad grandi na vivienda adecuado y servicionan specialisa pa hende grandi. Den cooperacion cu gremionan y otro instancia a establece e prome Foro pa Adultonan Mayor den cual a haci inventarisacion di e necesidad y ta propone solucion.
E partido ta enfatisa cu tin amplio posibilidad pa comercio innovativo den e sector aki y den e proximo Gabinete RAIZ nan lo sigui cu e proyecto y ehecuta e siguiente fase caminda sector financiero y gobierno hunto lo amplia e productonan financiero cu ta necesario pa crea mas vivienda y servicionan dirigi na adultonan mayor
Lesa mas tocante e perspectivanan di partido RAIZ den siguiente edicion.
