Partido Raiz a cuminsa cu presentacion di nan candidato

Ayera mainta partido Raiz a convoca un conferencia di prensa pa asina duna di conoce cu for di awor nan lo ta mas activo pa trece informacion pa comunidad tocante nan candidatonan.

Ursell Arends, lider di e partido, a expresa cu for di 2017 e partido aki a lanta, pa motibo cu “Aruba tabatin mester di un detox di e politica tradicional”.

Igualmente, el a recorda cu na aña ey cu apenas 77 dia y cinco candidato riba nan lista, nan a logra un total di 2.107 voto; pero igualmente nan no a logra un asiento. “Aunke nos no a logra drenta den parlamento, esey no a kita nos di sigui representa tur esunnan cu a pone nan confiansa den nos”, Arends a sigura.

El a identifica e partido, pero no como opositor ora nan no a logra e meta den eleccionnan pasa, manera Arends a señala. Loke nan a haci ta hala un banda y brinda tur oportunidad pa gobierno eligi por a goberna. Esey no a kita cu durante e proceso di e ultimo tres aña aki nan a vocifera y trece nan opinionnan dilanti y tambe manifesta nan disgusto unda cu nan a wak cosnan cu no tabata bayendo bon.

“Nos ta contento cu varios di e temanan cu nos a trece dilanti Gobierno a tuma nan y a inclui esaki den nan maneho. Kisas no na e manera mas efectivo y eficiente, pero ainda ta falta pa cumpli cu esakinan”, Arends a bisa.

Despues di 2017, Arends a menciona cu nan no a para keto y nan a sigui prepara nan mes. Door di entrega algun investigacion, nan a zorg pa trece transparencia den maneho di cierto ministerionan, segun loke el a expresa. Un di nan tabata e proyecto Isla di Oro, e cual den nan punto di bista tabata dañino pa naturalesa. Nan a colecta mas cu 9.000 firma pa un moratorio riba construccion di hotelnan nobo y alabes, Arends a comenta cu nan a para fuerte contra e ley dudoso di Serlimar.

Na aña 2020, el a afirma cu nan a logra organisa nan a academia di bon gobernacion y pa e motibo ey nan lo cuminsa presenta nan candidatonan pa eleccion 2021.

Di su parti, Raymond Kamperveen miembro di partido Raiz a sigura pa medionan di comunicacion presenta cu tur diabierna nan lo cuminsa introduci un candidato nobo, duna informacion y temanan riba nan manifestacion 2021.

Kamperveen a trece dilanti cu Raiz no un ta extension di ni un grupo y di ningun partido, nan ta un mescla “un melting pop” manera el a declara, di diferente ideanan, hendenan y gruponan pero tur cu un solo vision pa sigura e bienestar di Aruba y tur su habitantenan “no solamente awor pero pa tur nos futuro generacionnan”.

A la bes, nan a introduci su prome candidato drs. Ling Wong cu tin experticio den area di asuntonan economico na Aruba, tambe e tabata fungi como presidente di Banco Central di Antia Hulandes, na aña 1986 e tabata un consehero financiero economico pa e prome gobierno di Aruba for di status aparte, entre otro funcionnan cu el a haya.

Wong a introduci su mes como economista di Universidad di Amsterdam na Hulanda y e no ta mira su mes como un politico pa via cu pe e palabra politico tin un connotacion negativo pa su persona, “e ta sinonimo di corupcion, deshonestidad y ladron, yama mi sirbido di pueblo” el a sigura.

El a informa cu door di cuminsa traha cu Raiz, di gusta nan modo di pensa, el a wordo pidi pa varios biaha pa forma parti di e candidatonan cu despues el a acept’e.

Di otro banda, a wordo puntra pa Wong cua ta e diferencia entre politica di antes y politica di awor door cu situacionnan semper ta cambia, pa cu esaki Wong a anuncia cu awor Aruba ta bay cambia, awor ta momento di haci aliansanan cu ta na bienestar di e pueblo, loke ta nifica cu no por sigui bringa cu Hulanda, mester busca un aliansa pa coopera cu otro.

Di loke ta trata e plan di partido, nan a menciona cu na 2017 Raiz a pasa den historia como e prome partido politico cu a presenta un financial paragraph den campaña, “desde 1986 cu ta status aparte bo por puntra tur partido politico di tur nan plannan cu a presenta si nan a bisa pueblo con nan ta bay paga pe y nos a demostra esey caba”, nan a contesta.

Asina mes, el a comenta cu pueblo cu kier wak un plan pero tanten cu nan lo no tin esey concreto tocante kico ta bay ta nan rol den parlamento y den gobierno, pa motibo cu e landspakette tur cos ta wordo cambia y cu nan mester tin claridad di con ta bay sigui, pa wak kico nan rol ta bay ta, e ora ey nan lo presenta nan plan pa wak si ta cuadra cu loke Hulanda ta desea tambe .