Partido PPA ta contento cu Gobierno a dicidi pa bay Corte di Casacion

Partido PPA ta aplaudi e decision di Gobierno di Aruba pa bay Corte di Casacion prome cu e deadline di e fecha 6 di maart 2023. Aruba nunca a ratifica matrimonio di mesun sexo manera Hulanda a haci y Aruba su posicion tocante esaki tabata cla riba esaki desde 1999.

Matrimonio den Codigo Civil di Aruba ta conforme cu e Convenio Europeo di Derecho Humano articulo 12 (EVRM-Europees Verdrag voor de Rechten van de Mens). Matrimonio ta entre un homber y un muhe. E convenio (EVRM) ta definie diferencia explicitamente entre union di parehanan di mesun sexo, cu un diferencia den e derechonan di matrimonio entre homber y hende muhe.

Matrimonio di mesun sexo no ta un derecho humano den e definicion di e convenio (EVRM). Banda di esey e convenio no ta obliga ningun Estado, den e caso aki Reino Hulandes, pues tampoco Aruba como parti di Reino den implementa/adopta matrimonio di mesun sexo.

Den esaki Aruba no ta discrimina den no implementa matrimonio di mesun sexo!

Si por bin provisionnan p’e parehanan di mesun sexo, manera cu e convenio ta menciona. Considerando e intencion di e sentencia, PPA ta contento cu Gobierno di Aruba a bay Corte di Casacion y cu Gobierno a haci su posicion conoci na Pueblo di Aruba.

Statuut di 1954 ta establece cu e 4 paisnan lo salvaguardia nan mesun interesnan y e relacion dentro di Reino. E topiconan cu ta aparece den articulo 39 inciso 1, manera e derecho civil ta asunto interno di cada Pais, pues tambe codigo civil cu ta estableci na Aruba. Parlamento di Hulanda no ta bay over di esey y lo no por interveni tampoco den esaki.

PPA ta para pa democracia cu poder legitimo di Parlamento y di e Gobierno di Aruba, cu ta responsabel pa establece leynan democratico di e Pais.

Democracia ta cu e Pueblo ta eligi! Den esaki ta keda cu solamente Parlamento y Gobierno tin e derecho conforme ley cu ta duna nan e autoridad y poder legal pa duna cuenta tocante kico ta matrimonio, y kico no y kico matrimonio ta keda nifica pa Aruba. E claridad y autonomia dentro di Reino mester keda salvaguardia.

Tambe PPA ta reconoce e falta di huristanan specialisa den trahamento di leynan, cualnan ta crea buraconan den e sistema legal cu no ta completamente na ordo. Unda tin ley faltante, lo por wak n’e splicacion/interpretacion dentro di e sistema legal Hulandes, pero Constitucion tambe ta laga espacio pa interpretacion den e contexto di textonan di ley riba base di autonomia y igualdad dentro di Reino. Akinan Aruba no ta actua contra Statuto.

Aruba ta parti di e 145 paisnan dentro di pais reconoci pa Nacionnan Uni (VN) mundialmente cu no kier matrimonio di mesun sexo. Aruba ta maneha dentro di margen di e convenio (EVRM). Tampoco institucion di matrimonio di mesun sexo ta parti di palabracionnan dentro di Reino, cual ta haci cu un midi pa tur (one size fits all) no ta bay.

Con ta sigui awo cu Statuto. Pa basta tempo tin un expresion di necesidad pa evaluacion extenso dentro di Reino di e Statuto. E ta bay mas pa tin un solo aplicacion y interpretacion di e textonan di ley y e consecuencia pa e paisnan, por ehemplo articulo 39 y articulo 40.

E interaccion dentro e paisnan di Reino ta hopi importante, pa e interpretacion di textonan di ley explicitamente den topiconan trata den articulo 39 inciso 1, pa keda wak e ley civil den e relacion conhunto cu e otro articulonan stipula den Statuut.

Den Reino ta puntra pa e diferente leynan dentro di e paisnan ta mas tanto posibel alinea y explicabel (articulo 39 inciso 1)mientras tene cuenta cu un punto mes importante di e participacion di e paisnan den Reino, dus tambe Aruba) den e proceso legal (inciso 2 di articulo 39). Paisnan mester ta obliga y como rekisito firme den Statuto pa consulta cu otro prome cu un ley cu por tin impacto riba e otro partidonan den Reino wordo implementa, manera ta e caso di matrimonio di mesun sexo.

Matrimonio di mesun sexo ta conta pa Hulanda y pa BES so.. PPA ta puntra su mes: con envolvi Aruba tabata y kico tabata Aruba su manera di wak e introduccion di matrimonio di mesun sexo na Hulanda y si en caso Hulanda a cumpli cu e stipulacion di consulta manera stipula den Statuto.

Tabatin consulta cu otro basa riba e principio di igualdad entre paisnan?

Otro manera di wak esaki ta permiti y e introduccion di matrimonio di mesun sexo por ta rechasa. Tur ley nobo cu inicia pa un pais den Reino ta pidi e opinion di e otro 3 paisnan, solamente cu experiencia ta dicta cu Hulanda ta tuma e posicion di liderazgo den introduccion di ley nobo.

E decision di corte pa PPA ta hopi cla. E huesnan por evalua basa riba tratadonan internacional. Aruba a ratifica den Reino e Convenio Europeo pa derecho humano di y tin di tene su mes n’e tratado internacional aki. Den e caso aki Hues a sinta riba stoel di parlamento y di Gobierno. E sentencia ta un respuesta cu ta sigui e 29 paisnan cu un filosofia LBGHTI y ta uza ehempel di paisnan, mescos cu e islanan BES cu no tabatin nada di bisa den e introduccion di matrimonio di mesun sexo.

E ta bay tambe hopi mas leu cu palabracion di e Convenio Europeo pa derecho humano. PPA ta haci un yamada riba e Gobierno pa dentro di e definicion di Statuto pa duna di conoce dicon Aruba ta diferencia di Hulanda den e principio matrimonio y di regla matrimonio di mesun sexo “den manera di acuerdo”

Aruba por y tin e opcion dentro di e reglanan di Statuto pa tin argumento fundamental basa riba e desaroyonan den pais cu ta un resisti contra e mesun ley cu su clarificacion (uitleg), cu aclaracion di cos cu no ta cla y cu prueba di argumentonan di diferencianan di mesun regla di ley cu por splica.

Tambe basa riba su Bukinan di Ley Civil, Aruba por yega na otro conclusion y necesidad pa matrimonio y no amplia e matrimonio pa e mesun sexo.

Matrimonio di mesun sexo na Hulanda no ta bay igual na Aruba y no ta cay bou di e norma (articulo 40 di Statuto) cu por wordo impone of obliga pa ehecuta, tambe considerando e consideracionnan legal di e Pais.

Gobierno di Aruba lo mester duna cuenta na e Pueblo pakico tin deficiencia den ley na Aruba cu ta cuestiona y con a base democratico lo bay resolve esakinan den un tempo corto, p’asina por regla pa pareha di mesun sexo nan derechonan di registracion.

Aruba ta mantene su derecho basa riba decisionnan democratico di e Pueblo pa nan mesun codigo civil cu ta acepta dentro di e margennan di Statuto.

Aruba ta alinea riba e definicion di e Convenio (EVRM articulo 12), manera cu PPA ta para pe, matrimonio ta entre homber y hende muhe. Un diferencia tin si: actanan autentico di matrimonio (homber-muhe) of e matrimonio di parehanan di mesun sexo dentro di Reino ta reconoci pa henter Reino.

Den corto: PPA ta apoya e decision di bay Corte di Casacion basa riba e principionan menciona anteriormente y ta pidi Gobierno pa duna splicacion n’e Pueblo di Aruba.