Despues cu diabierna ultimo partido POR a causa un sorpresa exigiendo renuncia di minister Marisol Lopez-Tromp, informacion mas recien ta indica cu den interes general di nos pais, a nombra un comision di mediacion pa evalua opcion pa e siguiente pasonan.
Dialuna – deadline cu partido POR a duna Lopez-Tromp pa entrega su renuncia – Lopez-Tromp a declara cu e no ta mira motibo pakico e tin cu retira. Asina a keda un situacion dificil y incomodo pa tanto partido POR como Gobierno, maske prome minister Evelyn Wever-Croes a declara e asunto como algo ‘interno’ den partido POR.
“Hecho ta cu e mensahe cu Partido POR a dirigi na minister Marisol Lopez-Tromp a wordo tuma hopi na serio. Na mes momento a tuma nota cu tin espacio pa dialogo”, e partido a bisa den un comunicado di prensa ayera nochi.
Wever-Croes tocante e asunto a resalta cu den e situacion actual di crisis di pandemia, di cual ainda Aruba no a recupera completamente, gobierno tin mester di trankilidad y stabilidad pa atende cu e crisis. Esaki a keda refleha den e comunicado di POR, den cual a expresa: “Mirando e crisis mundial cu nos pais ta pasando [aden] y e embergadura y impacto grandi cu cualkier siguiente paso cu lo por wordo tuma lo por tin, partido POR a nombra den interes general di nos pais un comision di mediacion, pa explora tur posibilidad prome cu partido evalua un siguiente paso.”
