Awe den oranan di mainta, minister di Husticia, Andin Bikker hunto cu e parlamentarionan Dellanire Maduro y Alan Howell di partido POR a ofrece un conferencia di prensa extraordinario pa medionan di comunicacion local, pa informa cu partido a solicita e retiro di minister di Infrastructura, Medio Ambiente y Desaroyo Teritorial Marisol Lopez-Tromp.

Asina a duna di conoce Bikker na mesun momento cu el a manifesta cu desde cu e partido a apunta Lopez-Tromp pa e cartera di Infrastructura, ‘nos a ripara cu e a scoge pa ta individualista’. “No tin comunicacion cu fraccion ni cu partido y mi persona como mediador a haci hopi esfuerso pa mehora e comunicacion cu e partido y cu fraccion pa recorda e persona cu nos ta biba den un democracia parlamentario”, Bikker a señala.

Bikker a declara cu a manda un carta pa Lopez-Tromp cual ta bisa cu considerando cu su persona ta representa y sosteni pa fraccion di POR, el a opta pa no tin comunicacion cu e partido entre otro motibonan y cu e pais ta pasando pa momentonan dificil debi na e crisis di Covid-19. Sinembargo el a tuma decisionnan cu tabata contrario na e maneho, exponiendo pais Aruba den decisionnan innecesario den corte y poniendo varios trahado den incertidumbre pa cu siguridad laboral. Te hasta haci presion pa compania Sui Generis Serlimar, asina tambe su persona no a pidi conseho di departamento huridico of Ministerio di Husticia. Tambe den e carta ta specifica cu partido a pidi Lopez-Tromp pa duna un splicacion, pero segun el a prefera pa no tin dialogo y a scoge pa neglisha varios invitacion, como si fuera cu e ta un mandatario soberano y cu no ta existi democracia parlamentario.

E carta a sigui specificando cu nan no ta haya un speransa pa cambio y comunicacion cu e partido POR y cu den e situacion actual, tumando den cuenta e constitucion y historia democratico parlamentario, nan a haci un mocion di lamento, desaprobacion y desconfiansa cu no por wordo exclui. Pues su posicion como minister cu ta representa partido POR a bira completamente insostenibel.

Pa via di esaki nan a solicita pa Lopez-Tromp, di e mesun forma cu a wordo nombra como minister di partido POR, pa pone su posicion como minister na disposicion lo mas pronto cu ta posibel, en todo caso no mas laat cu dialuna awor 8 di juni pa 10.30 di mainta. Ademas tambe a pidi pa no tuma ningun decision den su capacidad como minister cu por tin consecuencianan grandi pa pais Aruba.

Despues di lesa e carta, Bikker a informa cu e ex-mandatario Otmar Oduber a informa e partido cu e ta bay bek den sector priva. Manera a keda conoci pa varios luna caba cu e no lo ta politico mas pa diferente motibonan, entre un di nan su salud.

Bikker a aclaria cu Oduber no tin e intencion pa bay bek den ningun funcion den partido ni como minister. Di loke ta trata ken ta bay reemplasa Lopez-Tromp como minister, esaki lo ta un decision cu partido tin cu bay dicidi riba dje. Pero a insisti cu e intencion no ta pa Oduber bin bek como minister, te na e momentonan aki nan ta atende cu e decision cu nan a tuma.

“Den politica bo tin cu tuma decisionnan y tin biaha cu ta decisionnan hopi fastioso y dificil”, Bikker a manifesta.

Tambe, Bikker a sigura cu nan no ta move pa interesnan particular, nan a goberna hunto, campaña cu mandato di pueblo. Pero mester tin disciplina di partido y na momento cu ta haya un minister cu ta tuma decisionnan riba su mes, esey ta afecta e mercado laboral y cu no ta consulta cu ni un hende ni cu fraccion. Pa sistema parlamentario ta funciona mester tin confiansa di e fraccion; den caso aki e no tabata consulta pa lunanan caba y esey ta e hecho.

Un di e decisionnan cu Bikker a referi pa partido duna un mocion di desconfiansa pa Lopez-Tromp ta esun di prohibicion di entrada di ATV y UTV pa Parke Arikok. Pa cu esaki Bikker a sigura cu esey tabata un poder cu ta atribui pa su persona como minister di Husticia y cu Lopez-Tromp no por tuma decisionnan riba e tipo aki.

Di esaki, el a comenta cu nan a tene reunionnan di compania operador di tour cu aproximadamente 600 cupo di trabou cu ta na peliger den crisis aki di Covid-19. Di loke ta trata Serlimar, Bikker a referi cu Lopez-Tromp a crea un precedente hopi peligroso.

Pa finalisa, Bikker a trece dilanti cu nan lo warda te dialuna awor pa wak kico lo pasa y ki decision lo mester tuma.