Partido POR lo entrega keho na husticia riba politiconan cu a cumpra voto

Dialuna mainta durante prome rueda di prensa di partido POR despues di eleccion, lider di e partido Otmar Oduber a anuncia entre otro cu lo entrega keho na husticia riba politiconan cu a cumpra voto.

Partido Por lo ta bay ta entregando un denuncia oficial den e caso aki  contra politiconan, ministernan cu a presta nan mes na cumpra voto, segun sr. Oduber.  “Nos tin e pruebanan necesario caminda cu lo bay over pa entrega e kehonan aki contra personanan aki.” E ta sigui bisa cu na st. Maarten por ehempel y otro paisnan tambe, hendenan a keda condena pa esaki. “Nos ta haya cu e posicion cu a wordo tuma pa medio di entre otro sr. Eman, Mike de Meza y otronan caminda cu a bay y cumpra voto.  Esaki ta algo cu mester caba y keda den pasado. Den e analisis ey nos a bisa semper cu e partido aki ta un partido nobo cu a cuminsa for di 0. Esey ta loke a tuma luga dies luna pasa, y ora wak e resultado con comunidad di Aruba a duna nos e dos asientonan aki pa por bay goberna e pais aki den un coalicion. ” E partido ta bay haci un denuncia segun sr. Oduber pa evita cu den futuro e tipo di actonan aki por sigui tuma luga.

“Nos no ta kere cu ta corecto cu fondonan publico di pais Aruba ta keda uza pa defende gobierno y core campaña.  Aworaki e enfoke ta pa percura pa e pais aki haya mas pronto cu ta posibel  un gobierno nobo di cua signatura den parlamento cu por ta, trece e cambionan cual mi ta kere ta prioridad number un.”

Coalicion cu AVP lo ta “bofta pa pueblo”
Sr. Oduber a comenta cu lo ta un “bofta pa pueblo” pa forma gobierno cu partido AVP mirando e rechaso cu pueblo a duna e partido aki segun resultadonan di eleccion. E ta bisa: “Mirando en todo caso e rechaso grandi cu tabata tin y pueblo cu a bira lomba pa un gobierno cu a perde mas cu 10 mil voto. Un partido cu a bay atras cu cuater asiento cu ta un di e perdidanan di mas grandi di partido Avp mi ta kere den historia di su existencia.  Pero tambe pueblo di Aruba a rechasa un partido cu a bay eleccion caminda cu tin un minister di su gabinete den momentonan aki cu ta acusa di corupcion, labamento di placa y traficacion di persona.” Den e caso aki pa partido Por segun sr. Oduber, ta bira imposibel pa nan cu a haya sosten cu dos asiento, pa por forma un gobierno cu partido Avp.  E ta bisa cu: “Mi ta kere cu locual ta importante den cualkier coalicion cu por ta, ta pa bo tin un base fuerte, solido. Y e base ey ta yama bo programa di partido cu ta bira programa di gobernacion, y cu bo ta traha na interes di comunidad di Aruba. Pueblo di Aruba a escoge pa tres di e programanan ey, mirando cu tin tres partido cu a bay dilanti den eleccion ultimo. Y a rechasa na un forma categorico na corupcion y falta di integridad, falta di liderasgo den nos comunidad pa loke ta trata e resultadonan di eleccion ultimo.”

Coalicion cu MEP y RED
Sr. Oduber ta bisa cu programanan di partido Mep y Por lo por yega basta facil na un convenio a base di programa.  Cu partido Red, a pesar cu nan a haya confiansa di comunidad y no por descarta esaki, e prioridadnan di partido Red no ta cuadra cu esnan di partido Por segun Oduber. “Den e proceso nos dilanti lo por determina con amplio e base lo por ta pa forma e proximo gobierno.” Oduber ta bisa ora cu forma un coalicion, e interes di partidonan no ta importante mas. Ta interes di pueblo ta importante.
“Cada partido tin nan prioridadnan y nos tin nos prioridadnan hopi fuerte nos dilanti cu nos a campaña durante ocho luna largo cu ne. Nos lo mester discuti esakinan y naturalmente mescos cualkier coalicion y unificacion cu ta tuma luga, mester ta basa ariba respet y confiansa. ”

Encuentro cu gobernador
Awe merdia pa 3’or or mester tuma luga un bishita di su excelencia gobernador Alfonso Boekhoudt pa loke ta trata informacion y intercambio di pensamento riba resultado di eleccion. “Naturalmente un temporada di eleccion cu nos a mira atakenan hopi fuerte, hopi personal directo entre otro riba mi persona pero tambe riba otro integrantenan di partido. Caminda cu a uza medionan di comunicacion cu tabata na alcanse riba payroll y contract di gobierno pa por ataka nos partido na formanan hopi baho,” sr. Oduber a comenta.  “Sin embargo pueblo a responde y duna e partido aki cu manera mi a bisa, cu a penas ocho luna di existencia, dos representacion den parlamento di Aruba. Y pa cual naturalmente nos ta gradici comunidad di Aruba pa habri e portanan pa permiti nos drenta cu nos programa den un tempo asina corto.”

Akinan por mira henter e rueda di prensa di dialuna mainta