Awe den oranan di atardi, partido POR a ofrece un conferencia di prensa pa informa comunidad cu nan ta presentando un carta cu un plan pa loke ta e situacion di COVID-19.
Pa cu esaki, minister di Husticia, Andin Bikker a informa cu esaki ta un carta cu ta pone cierto ideanan dilanti pa nan discuti. Te na e momentonan aki, nan a dicidi di pone den dje por ehemplo un ley di rescate, cu segun Bikker mes a sigura, tabata den e plan di gobierno cu a presenta den eleccion.
Otmar Oduber, lider di partido POR a expresa cu a base di comentarionan y sugerencianan cu a bin di un reunion cu un grupo di comerciante y instancianan, nan ta presenta esaki cu varios pregunta cu nan a haci como partido, cu e meta di con cu e crisis aki por sostene e comunidad den un forma mas optimo cu ta posibel, cu menos hende posibel sigui perde trabou y cu menos hende lo sigui perdiendo nan entrada, a pesar cu esaki ta un situacion inevitabel.
Asina mes, el a señala cu e documento ta presenta diferente escenario cu ta bin, cu Aruba por confronta su mes como pais y cu ta depende di 90% di e mercado di turismo, cu na e momentonan aki tin un efecto mas grandi compara cu otro pais.
Despues di pone diferente proposicionnan dilanti, Oduber a manifesta cu a bin un plan di accion cu ta un proposicion di e partnernan di coalicion di gobierno.
Di mesun manera, el a bisa cu e documento ta atende cu gastonan y debenan cu gobierno cu mester wordo reduci drasticamente, como por ehemplo un suma di 100 miyon florin cu ta wordo proponi pa e aña aki caba pa reduci den aparato di gobierno, tanto di gasto operacional como di personal.
Pa finalisa, como partido POR nan ta sostene e decisionnan cu a wordo tuma na e momentonan aki, asina mes como a afirma cu e contribucion aki como partido ta yuda pa nan por tin un miho producto na final di dia a base di e trabou grandi cu a wordo haci pa tur tres partido.
