Partido Otmar lansa como Pueblo Orguyoso y Respeta (POR)

Ayera mainta Otmar Oduber, ex minister di Turismo, Cultura y Transporte, a presenta e prome tres candidatonan pa su partido. Na mes momento el a anuncia e nomber di e partido cu lo ta Pueblo Orguyoso y Respeta, POR.

“Manera ta conoci cu desde a anuncia cu lo forma un plataforma nobo aki na Aruba, un forsa nobo pa loke ta trata e pueblo orguyoso y respeta di Aruba cu continuamente nos ta boga pa tin un politica rehubenece. Pero tambe un politica di caracter nobo, un caracter caminda cu e comunidad di Aruba por participa hopi mas den loke ta su gobernacion, den su mundo politico,” sr. Oduber ta indica.

Tambe e ta bisa cu e gobierno por ta un gobierno cu ta duna oido y ta compromete su mes cu loke e ta presenta na comunidad y hunto cu ne un Parlamento cu nan ta boga pe cu ta haci su control na e forma debido y naturalmente cu por respeta e derecho di cada ciudadano cu ta biba riba Aruba. P’esey e plataforma aki a haya bida y den ultimo simannan nan a combersa hopi persona den e comunidad.

Nan kier ta un diversificacion pa loke ta e representacion, e miembronan cu lo bay tin den e plataforma aki. “Manera ta conoci, diadomingo awor dia 11 di december na Cas di Cultura pa 10or di mainta, lo funda partido POR.”  Manera e slogan ta bisa, y lo wordo manteni desde awor te cu september binidero, cu nan ta representa e forsa nobo di Aruba hunto cu e comunidad di Aruba, hunto cu tur esunnan cu a uni nan mes durante e ultimo simannan via yamadanan, via social media, via facebook y na un gran cantidad di otro forma.

Sr. Oduber tambe a presenta tres candidata cu lo bay ta riba e lista pe eleccion di 2017. E prome tres candidata cu lo ta riba e lista di e partido POR ta Joselin Croes y Jacqueline Ponson-van Putten manera Bon Dia Aruba ya a publica y tambe Michella  Steenvoorde-Laclé. Diadomingo lo presenta e otro candidatonan manera e conocido Dilma Arends Geerman.

Sra. Croes pa shete aña ta abogado na Aruba. Desde e momento cu el a anuncia cu su persona lo participa den e proximo eleccion, el a wordo acerca pa hopi persona. “Mi mester bisa hopi positivo.” E ta indica cu el a wordo puntra tres pregunta crucial, y ta preguntanan cu hopi lo kier haya un contesta. “Esaki ta locual mi kier comparti cu boso. E preguntanan ta dicon drenta politica bek despues di casi 20 aña, cu cua partido mi ta bay cual ta obvio cu cua mi ta bay, y e ultimo pakico mi a scoge pe partido ey y ki cambionan e kier trece pa mi pais.”

E prome pregunta tabata uno facil pa su persona pa motibo cu esaki ta sali di su curason. El a drenta politica awo pa motibo cu si e sigui sapatia y zundra, sigui rabia ora gobierno tuma un decision, e lo no trece niun cambio y e ta haya cu esey ta e berdad. “Si nos tur dicidi di keda leu di politica, e ora nos tin cu acepta cu e dos partido grandi lo keda goberna nos pais. Y cu nos mester tuma e situacion manera e ta pasobra nos niun no ta bringando, nos niun no ta drentando ey den pa trece un cambio.” Pa su persona esaki ta un tarea, un trabou. E ta bisa cu e kier traha pa su pais, e kier pa bin cu un cambio den e forma con ta hiba e politica. Sra. Croes kier pa tin e confiansa di pueblo. E cambio tambe mester bin den e forma con ta controla gobernacion. Sra. Croes ta kere cu a yega momento pa pone e prioridadnan di Aruba straight. Mira kico ta importante pa Aruba, y unda e pais kier bay.

Sra. Steenvoorde-Laclé ta un docente y ta haci diferente trabou boluntario. Su interes ta riba e parti di enseñansa aki na Aruba. E kier mira cambio den esaki. “Ami ta cla, abo ta cla pa un biento nobo. Ban laga e politica bieu atras y ban bin cu plannan concreto. E mester ta realisabel. E mester ta controlabel y tambe nos plannan mester tin un tempo specifico pa caba nan.”

E pueblo di Noord ta grita pa un scol, esta MAVO, HAVO y VWO, segun e.  Esey ta un di e motibonan pakico el a join e plataforma. “Combersando cu sr. Otmar, mi a realisa cu enseñansa ta prioridad number 1 di nos. Tanto bal bo tin un caretera bunita, un Aruba bunita y bo pueblo no ta culto y inteligente. Pasobra nos mester siña nos personanan, nos mester inverti den conocemento pasobra tanto bal bo ta bunita di pafo y paden bo ta bashi.”

Sra. Ponson-van Putten ta conoci den e mundo di deporte. El a sigui den deporte pa motibo di su tata sr. Roy van Putten y e no por a compronde e lema mas deporte menos bicio. E no tabata compronde pero despues cu el a regresa for di su estudio, el a bin compronde kico su tata kiermen. Hubentud a haya oportunidad pa haci deporte. Pero si e mira bek con deporte ta awo y antes, e ta mira cu esaki no ta na e nivel cu e mester ta. “Mi ta aki nan pa mi hisa e deporte na unda e mester ta. Nos mester dedica nos mes bek na e pueblo, na e hubentud pa deporte. E clubnan, e organisacionnan mester haya atencion bek. Y no mester lubida riba boluntarionan.”

Pa su persona ta importante pa mira e cambio aki y p’esey e kier forma parti di e cambio aki. Deporte ta importante pa e parti social, e parti di educacion. Y si tin un mucha cu ta practica deporte, su educacion lo ta uno positivo, segun e politica nobo. Su comportacion, su bida social lo ta positivo y KIA lo por ta hopi bashi. “Hubentud mester haya bek e oportunidad pa practica deporte.”