Ta casi sigur cu ta bay tin un partido nobo cu ex ministro di turismo na cabes. E prome pregunta ta kico esaki lo bay contribui na e panorama politico di Aruba. Loke nos por a comprende di su palabranan den rueda di prensa, e diferencia lo mester ta den e manera di haci politica, un kiebra cu e manera tradicional di practica politica. Si esey ta berdad anto esey lo ta un beneficio pa nos sistema politico.
Pero manera den tur cos, ‘hay que ver para creer’. Lo ta algo realmente asombroso cu un politico cu a bira grandi dentro di e sistema tradicional politico na Aruba, ta bira e campeon di haci lo corecto moral y eticamente. Ta tanto el a siña di con su ex coleganan a trat’e den e conflicto cu a hiba na su salida? Despues di 27 aña den e sistema tradicional, diripiente el a haya un sagrado iluminacion cu e ta rechasa nan manera di haci? Duro pa kere, pero tur hende tin derecho di purba logra loke nan ta propone. Pero ban wak kico ta e cosnan cu e por haci diferente.
Por ehemplo, e ta bay practica transparencia? Ban mira con su mes prestacion tabata te awor. Un di e problemanan mayor di gobernacion te awe ta na nos opinion cu ta nenga redondamente di pone e informacion di por ehemplo e empresanan estatal na disposicion di publico. Anto ‘di nos’ nan ta? Den e caso di e entidadnan cu Otmar Oduber tabatin bao su custodia como ministro nos no conoce ningun cu ta publica boluntariamente nan cuentanan anual. ‘Coreccion’, un persona por bisa: tempo cu e tabata ministro el a percura pa un fundacion di carnaval nobo, cu statuut completamente supervisa pa su persona. Naturalmente el a percura pa e ministro di turno tin un influencia pisa den e fundacion. E fundacion aki tur aña cu orguyo ta publica su cuenta anual manera ta para den nan statuut. Merito di e ex ministro? No, bao presion di otro participante den e consulta pa yega na lanta e fundacion, a pone e stipulacion aki aden. Pasobra si transparencia ta importante, pakico nos no por haya cuenta anual di ATA, Aruparking, Arubus, etc.?
Otro aspecto ta e custumber di mantene un grupo grandi di hende rond di e ministronan, aparentemente pa nan por funciona. Mientras cu Oduber no tabata un di esnan mas pecador den esaki, tampoco e tabata un di e chikitonan. Si e mester bin atrobe den un gobierno, e ta continua cu e practica aki, of e ta cuminsa un bida nobo?
Un di e aspectonan cu el a toca den su critica riba e situacion cu a hiba na su salida tabata e falta di coordinacion entre e ministronan, loke ta mustra tambe riba falta di un vision comun cu ta sirbi como base pa e maneho cu un gobierno kier hiba. Esaki ta algo cu sigur por mehora, pero ta keda un par di pregunta. Nos no a mira den shete aña un vision coherente unda gobierno kier bay. Naturalmente nos tin un Prome Ministro cu su propaganda berde, mientras nos no ta mira un maneho consistente cu ta cuadra cu su bunita vision. Pero, kico Otmar Oduber mes tabata aporta na tur esaki?
Pa keda riba su tereno: na 2010/2011 e tabatin un grupo di trabao, cu participacion di varios gremio, cu tabata traha riba un analisis di e situacion den turismo. Un di e preguntanan clave tabata e cantidad grandi di proyecto cu tabatin den ‘pipeline’ pa crea mas acomodacion. E grupo a conseha bin cu un moratorio riba trahamento di mas acomodacion, preferiblemente den un ley. E contesta di e ministro tabata cla y raspa: “No”, pasobra e kier a tene su mannan liber pa haci loke e kier, ora cu e kier. Resultado: e grupo a fayece y e consecuencia nos por a mira den e añanan despues. E mesun ministro cu tabata aparenta preocupa cu crecemento excesivo di camber di hotel, a propone no solamente e hotel di Bahia na Sero Colorado, pero otro seis proyecto mas, pa un total di 2500 camber pariba di brug.
E pregunta cu ta surgi ta con serio nos mester tuma un persona asina. Cu e ta propaganda cierto desaroyo turistico pariba di brug, no ta ningun problema. Pero ora bo ta propone yega na 2500 camber, pa cual Aruba absolutamente no tin hende pa traha aden, un hende mester grita “para e loco ey”, manera su ex colega di partido a yega di grita den parlamento. Loke nos ta mira pa añanan caba ta cu ta abusa di cierto ideanan cu ta propaganda, cu cual tur hende por ta di acuerdo, manera ‘green’, ‘desaroyo sostenibel’, etc. mientras cu e maneho diario di cada ministro riba su mes ta net lo contrario na e filosofia cu a proclama.
Mira asina, por bisa cu e Prome Ministro ta percura pa e pantaya tras di cual e otronan ta dal bay cu nan plannan manera nan ta haya ta bon. Pregunta: Prome Ministro ta asina debil, o simplemente complice consciente?
