Partido MEP: Ta cual partido a introduci e lema ‘MEP Proof’? ‘AVP, un partido cu ta persigui su contrincantenan politico’

Cu un cara laba y treciendo un cantidad di barbaridad y mentira padilanti durante un protesta di contratistanan chikito dialuna ultimo y kendenan supuestamente lo a wordo persigui pa e gobierno actual, lider di AVP Mike Eman a declara durante e protesta aki cu ‘Den scol di AVP bo no ta siña vengansa’. Pero nada di e supuesto persecucion cu Mike a papia di dje no ta berdad y e director di DOW cu pruebanan a contradeci esaki totalmente.

Historia por ta cruel, pero lo ta bon pa recorda Eman cu den historia di pais Aruba su partido AVP tabata y ta e tata spiritual di persecucion politico. No solamente nan regimen a persigui contrincantenan cu tin un otro color politico, pero tambe profesionalnan trahando den gobierno cu tabata haci nan trabao manera debe ser.

Persecucion politico di AVP.
E masacre di persecucion politico contra MEP a cuminsa ora cu AVP a drenta gobernacion na 1986. E tempo ey nan a manda mas cu 800 trahado humilde di TAV cas, kendenan – trahando 2 siman si y 2 siman no – tabata gana un salario humilde pa cria nan famia. Tambe personanan nombra oficialmente na varios departamento di gobierno y pa cual tabatin vacatura habri na entrada di Status Aparte a wordo manda cas per direct, esta riba e prome dia di trabao na 1986. Politiconan y ex-diputadonan di MEP a wordo corta den nan schaalnan. Tambe e regimen di AVP a jaag sin misericordia riba un gran cantidad di director y otro ambtenaarnan di departamentonan di gobierno na Aruba y Hulanda (Arubahuis), a manda nan cas y otronan cu nan no a logra di kita for di trabao, nan a wordo manda den exilio na Hulanda. E persecucion tabata asina feroz cu te hasta e ex-Director di Asuntonan Economico mester a bay 10 biaha Corte pa para e burdugonan cu cueste loke cueste kier a elimin’e como director. Tambe den nan odio y vengansa contra Betico Croes, e regimen di AVP a percura pa kita beurs di su yiunan, kita Condecoracion di nos libertador, acusa Betico Croes den Algemeen Dagblad di Hulanda di a malversa 700 miyon florin (siendo cu e tabata den coma!) y pa cual despues e ex-Prome Minister Henny Eman a haya su mes ta rectifica e acusacion baho y vil aki.

Persecucion contra profesionalnan.
Pero no solamente a practica persecucion politico, pero AVP a persigui tambe profesionalnan Arubiano bon capacita cu tabata traha na Departamento di Impuesto y Finanzas. Asina por a mira con e Inspector y Ontvanger di Belastingen a wordo kita for di trabao inhustamente, ya cu nan a cumpli cu nan deber di cobra e placa di BBO cu refineria Valero debe pais Aruba y esaki basa riba un sentencia di hues cu a obliga Valero di paga 280 miyon florin. Hecho ta cu e regimen abusado aki di AVP no tabata kier pa nos profesionalnan haci nan trabao corectamente y kier a impone pa e profesionalnan aki kibra ley y exonera e multinacional di pago di BBO. Tur e profesionalnan aki nunca a demostra nan color politico, pero debi cu nan no ta complace cu e maldad di Gabinete Eman, nan tur a wordo cori for di gobierno.

Mas ehempel di persecucion politico.
Un otro ehempel bibo di persecucion politico tabata ora cu ex-ministro Sevinger manera ladron den anochi ta laga basha un kiosco di un Arubiano den Caya Betico Croes, pasobra e ciudadano aki ta aparece riba lista di MEP. E tempo ey den Corte hues a declara cu e regimen di AVP ta mina y zaag na e pianan di nos estado di derecho.

E scol di vengansa di Mike Eman.
Na final di 2009 e burdugonan di AVP a persigui tambe tur persona cu posiblemente por tabata liga na MEP, e.o. Mike Eman a dicidi di kita un cantidad di empleadonan publico na Cuerpo di Bombero 32, Casinowezen 12, Drugsbestrijding 15, DOPV 8, Taxista 52 , Lotto pa deporte y un gran cantidad na otro departamentonan.

Y finalmente lo ta bon pa recorda Mike Eman con un grupo grandi di manifestante dia 1 di oktober 2014 a ser maltrata, golpia y bati riba instrucccion di e regimen di Mike Eman y e scol di vengansa cu e ta dirigi. Pues ta bisto cu Eman y su hendenan di AVP no tin ningun tiki di consenshi!

AVP semper a practica persecucion politico, tanto na final di 1985, na final di 1994 y na final di 2009, unda nan a persigui y abusa di tur e hendenan di MEP, tratando di haci henter e pais ‘MEP Proof’.