AVP a cambia bo!
“Bo ta e persona mas inepto cu tin” … “Bo no tin weso di lomba”, tabata algun di e expresionnan cu Parlamentario Mervin Wyatt-Ras a expresa den direccion di Minister President Evelyn Wever-Croes den Parlamento diahuebs mainta.
Minister President a wordo invita den Parlamento pa duna mas informacion riba e acuerdo firma cu Hulanda siman pasa.
Sinembargo, e parlamentario di AVP a yega laat, y ora el a yega, e tabata papia y tira palabra y no tabata scucha e splicacionnan cu gobierno tabata duna. Obviamente e no tabata interesa den e informacion, pero solamente kier a bruha tera, y a cuminsa cu e insultonan baho contra Minister President cu ta lamenta cu e parlamentario aki, no ta atende cu su trabou na serio, pasobra esaki ta un topico hopi importante. Asina mes, memey di tur insulto, Minister President a keda profesional, dunando tur informacion y contestando tur pregunta.
Na final, Minister President a expresa cu e actitud di parlamentario Mervin Wyatt-Ras ta para mahos pa un parlamentario, y sigur pa un dama. Cu e no mester haci tur e trabou sushi pa partido AVP. “Mervin Wyatt-Ras, AVP a cambia bo!” Prome Minister a finalisa bisando.
Mester bisa si cu ultimo lunanan Mervin Wyatt-Ras y Gerlien Croes constantemente ta ataca y insulta Minister President na forma hopi baho. Nos di partido MEP ta lamenta y ta condena esaki. Minister President Evelyn Wever-Croes ta votegetter y lider di e pais aki. Un Minister President cu desde inicio di gobernacion, a wordo enfrenta cu crisis tras di crisis, pero cu a sa di saca Aruba for di cada un di nan. Cu e parlamentarionan aki ta rebaha nan mes na e nivel aki, ta puro muestra di nan envidia.
