Partido MEP a tuma nota cu e desesperacion di partidonan den oposicion ta escalando cada dia mas. Un desesperacion cu a manifesta desde cu Gabinete Wever Croes I a bin na mando. Desde e prome dia ey, ya oposicion a cuminsa grita cu e Gobierno lidera pa Lider di MEP, señora Evelyn Wever-Croes mester bay cas y mester bin cu eleccion di nobo. Y desde e prome dia di gobernacion Wever-Croes te cu awe, ainda nan ta sigui grita.

Partido MEP a tuma nota tambe, cu e desesperacion di partidonan den oposicion no solamente ta sin base, pero mas ainda, sin ningun argumento responsabel di loke cu nan si por ofrece pais Aruba. AVP, un Partido cu a goberna nos pais den tempo bon, na unda cu el a tuma 8 aña pa chica caha di Gobierno na prioridadnan robes manipula pa nan prensa comprometi, y a redobla nos debe, awe ainda no por presenta cu ni un solucion pa e retonan cu nos pais ta pasando den dje. Y con nan por presenta solucion si nunca nan a goberna den reto? Pero SI nan a laga retonan financiero, economico y social atras pa Gabinete Wever-Croes, cu prome cu e pandemia, a cuminsa drecha e rumbo financiero, economico y social di nos pais.

RETO PANDEMIA:

Ta bon pa recorda Mike Eman y su Partido cu Aruba a pasa den varios reto cu a causa cu e situacion financiero di nos pais a tambalia. Pandemia tawata un reto grandi. Henter mundo a pasa den dje. Y henter mundo a sufri hunto. Y Aruba, goberna pa un Gobierno responsabel, ta recuperando dia pa dia miho y mas resiliente. Tur cifra ta indica esey. Y si nos pais ta recuperando bon, ta cu ki intencion oposicion ta pidi eleccion nobo?

RETO GUERA UKRAINA:

Aruba a sufri consecuencianan di e guera di Ukraina. Un otro reto mas cu a bin den tempo dificil pa nos tur, durante pandemia. Consecuencianan cu ningun Gobierno mundial por a evita. Sinembargo, Aruba no a para na banda critica y grita pa eleccion, pasobra Aruba ta mira e progreso cu tin despues di a haya reto tras di reto. Gobierno di Aruba ta trahando, lorando manga pa hiba nos pais den e rumbo di union y positivismo. Y si nos pais ta bayendo den e bon rumbo, ta cu ki intencion oposicion ta pidi eleccion nobo?

RETO MIKE EMAN:

Y Aruba a sufri e pio reto, e mal gobernacion di Mike Eman. Gobernacion cu a causa nos pais e pio disaster economico, financiero y social. E pregunta ta keda, ta cu ki cara e Partido aki, e oposicion di mas grandi di Gobierno, awo ta pidi pa eleccion pa manda Gobierno cas? Kico nan tin pa ofrece si den tempo di bon mes nan a malgasta y pone nos pais den un situacion caotico manera cu Gabinete di Wever-Croes a bin encontra. Ta con nan lo goberna den tempo di reto manera nos pais pero sigur mundo henter ta pasando aden? Con Mike Eman por goberna si pa un cos chikito mes, el a bay bou palo y sinta yora bebe insure pasobra e no tawata tin curashi pa enfrenta un problema? Y si Mike Eman no por goberna drechi, ta cu ki intencion oposicion di AVP ta pidi eleccion nobo?

Partido MEP ta pidi oposicion pa ta parti di e union y positivismo cu ta reinando den nos pais. Pa stop di purba kibra nos pais. Pasobra oposicion cu su negativismo hamas por kibra nos pais. Nos pais a pasa den retonan duro y ta para firme y resiliente contra esnan cu no kier uni na progreso y bienestar di nos pais. Aruba ta di nos tur, y den union y positivismo, nos ta soluciona cada reto y hunto nos ta crea oportunidadnan nobo pa un Aruba miho cada dia.