Partido MEP na Mike Eman: ‘Cannabis recreacional no ta punto di agenda’

Tratamento den parlamento di presupuesto di pais Aruba ta algo serio. Pero un biaha mas nos ta wak con Mike Eman ta manda su ‘kleuterklassers’, miho conoci como Fraccion di AVP, bay para ripiti cu 1+1=3 den reunionnan cu pa Aruba ta sumamente importante.

Den programa di gobernacion, ta sostene un ehecucion di ley pa cannabis medicinal. Teniendo na cuenta cuanto hende na Aruba ya ta uzando e azeta di cannabis pa trece alivio den malesanan, incluyendo cancer. Tambe por scucha testimonionan di hendenan rond mundo kendenan a haya alivio y hasta a wordo cura di un of otro malesa.

Cannabis recreacional niun momento ta riba agenda di gabinete Wever-Croes, ni di partido MEP. Tampoco ta riba mesa di discusion den e tratamento di presupuesto den parlamento. Sinembargo, nos ta mira con Mike Eman ta manda su alumnonan grita den parlamento manera ta un speelschool a manda nan. Ta tempo pa Eman y su fraccion comprende cu tempo di hunga a pasa. Pueblo a bisa nan ta basta cu hungamento den parlamento, y ta tempo pa bira hendenan serio.

Nos ta ripara un Mervin Wyatt-Ras no tin nada otro di puntra cu si gobierno tin pensa di duna les contra uzo di droga na school. Esaki ta trece e pregunta cune: Gobierno di AVP no tabata trece conscientisacion di droga na scolnan durante 8 aña largo anto? Acaso Wyatt-Ras ta insinua cu maestronan durante 8 aña no ta duna conscientisacion na nos muchanan na scol?

Eman ta parce mas bien di tin hopi interes pa cannabis recreacional wordo aproba pa parlamento. Porta cu pa Eman, esaki lo cumbini su mes personalmente, y ta p’esey mes e ta manda su fraccion keda ‘hammer’ riba e topico aki, cu ni pa gobierno ni pa fraccion di MEP ta riba mesa. E unico topico riba mesa ta cannabis medicinal.

Loke Eman mester cuminsa haci ta pa duna su ‘kleuterklassers’ instruccion pa bay trabou, traha, informa nan mes cu realidad. Parlamento no ta un speelschool. Ta tempo pa nan cuminsa stop di manipula mente di un pueblo cu no ta ignorante. Ta tempo pa nan stop di pensa cu pueblo ta ignorante. Ta tempo pa fraccion di AVP cuminsa hiba debatenan na nivel serio y al caso. Ta tempo pa nan cuminsa tuma ehempel di parlamentarionan di MEP y traha y hiba debatenan cu ordo.