AVP no a wordo notifica unda e tubonan di gas lo a wordo pasa?
Partido MEP a tuma nota cu durante henter e reunionnan publico den e ultimo dos dianan aki pa trata e tema di Eagle LNG y WEB, Partido AVP a bin riba un pia hopi negativo den Parlamento cu e meta pa trece duda den e Proyecto di WEB y Eagle LNG y den Prome Minister di nos pais.
Pero loke nan no ta bisa pueblo ta cu nan mes, esta Partido AVP, a firma MOU cu GasUnie cu e mesun meta cu e Proyecto di Eagle LNG y WEB. Esaki sigur ta mustra e banda di hipocresia y deshonestidad di Partido AVP cu awo si nan ta critica un Proyecto cu nan tambe tawata tin durante nan gobernacion. Sea nan ta hipocrita, deshonesto of di berdad tur e Parlamentarionan di AVP y henter e Partido AVP ta sufri di amnesia.
Señor Mike Eman, ya no tawata sa unda pone su desesperacion den e reunion publico, y a cuminsa haci preguntanan no mucho normal cu e fin pa trece duda den nos comunidad. Señor Eman den su disertacion a menciona cu e tuberianan di gas ta bay pasa den curanan di cas y lo bay rementa.
E posicion aki di Mike Eman no solamente ta mustra su miedo y desesperacion, pero tambe ta un muestra cu Mike Eman y su Partido e tempo aya a core firma un MOU cu GasUnie sin cu nan mes tawata sa kico nan ta haciendo y mas ainda, nan no a wordo notifica unda e tubonan di gas lo a wordo pasa?
Pregunta na Mike Eman, unda bo lo a pasa e tubonan di gas e ora? Unda lo bo a hiba nan? Den aire, lama, den espacio? E hecho ta cu sentido comun ta bisa cu e tempo ey, si e Proyecto a wordo aproba, lo mester a coy e mesun caminda cu e tubonan ta pasa awor. Mas ainda, cada cas na Aruba tin boter di gas na nan cas, den cura, cu ta hopi mas peligroso cu tubonan. Y asina mes nan ta hopi sigur.
Crea panico den pueblo ta un otro manera di opera di Mike Eman. Jaloezie ta pone cu e no por cu su mes pasobra e no a logra e Proyecto aki pa Aruba despues di varios fiesta na grandi. Mike Eman sa hopi bon cu Gabinete Wever-Croes ta haci lo corecto y manera Prome Minister Evelyn Wever-Croes a menciona den su disertacion den Parlamento:
“Na momento cu Aruba libera su mes di e HFO, nos ta libera nos mes di e pasado. E futuro riba termino cortico ta den LNG y e tin hopi bentaha pa WEB, manera genera energia limpi, prijs ta mas stabiel, mas cupo di empleo, ta genera un desaroyo economico, divisas ta keda nos pais, medio ambiente ta wordo miho sirbi, nos rating agencies ta mas contento cu nos y por ta nos lo por yega na presta di nan atrobe”.
Señor Mike Eman sa hopi bon cu Aruba lo bay dilanti so riba diferente nivel cu e proyecto aki. Manera e profesionalnan di berdad a bisa, e proyecto aki ta ofrece suficiente flexibilidad pa asina nos por implementa otro alternativanan y si mester, acelera nan.
Awor aki, Aruba no tin tempo pa sinta warda pa otro energia nobo keda cla pasobra nos lo mester keda depende di HFO y pa Gobierno di Aruba esaki no ta un opcion.
