Partido MEP: Mientras MEP cu RAIZ si ta labora, AVP ta prefera sigui practica politica anticua di sinta haci nada y djis critica

December ultimo Gabinete Wever Croes 2 a anuncia un proyecto cu ta di suma importancia pa e desaroyo y progreso economico di nos Pais ademas di su balor agrega pa proteccion pa nos medio ambiente. Esey ta e proyecto di Eagle LNG, gas natural likido cu n’e momento cu e proyecto aki ta cla, lo percura pa e.o. reduccion di gastonan di produccion di energia cu na su turno lo transforma su mes den reduccion di awa y coriente pa nos pueblo y comercio.

Despues di tur e controversia cu oponentenan a purba na crea, tur esaki a keda desbarata na momento cu a bira claro den diverso publicacionnan, cu AVP ta “contra” e proyecto aki di GAS djis pasobra cu ta MEP a bin cune. E proyecto di Eagle LNG ta netamente un logro di nos Minister President Evelyn Wever Croes cu a wordo concretisa pa Minister Glenbert Croes.

Diferente declaracionnan di Mike de Meza den tempo cu e tabata Minister, no tabatin caminda pa gaba con bon nan proyecto di gas ta pa Aruba. Manera Mike de Meza a declara na 2016: “Minister ing. de Meza a papia di con e gas natural ta sirbi tambe pa un operacion mas eficiente di nos compania di produccion di awa y coriente, WEB Aruba N.V. Otro ehempel di un uso beneficioso di gas natural riba nos isla ta den transporte publico, pero tambe transporte en general. Te hasta turismo por conoce un impulso danki na e suministro di gas natural. “Hopi cruiseship ta cambiando nan fuel for di bunker fuel pa bay over pa LNG cu ta haci’e mas atractivo un bes cu bo tin e suministro ey na Aruba,” asina e titular di Energia a splica. Un bes cu e liñanan di crucero sa cu na Aruba nan por stop y ademas di haya un tremendo ‘port of call’ y alabes ‘tank’, sin duda algun, Aruba lo ta un opcion hopi mas conveniente compara cu otro islanan den Caribe.”  Esey ta palabranan di Mike de Meza, e Minister cu tabata prominente den AVP. Ta kico a cambia anto? Esey ta MEP su pregunta. Awe nan tur ta grita contra. Ta pasobra cu e ta un logro di MEP? Ta un berguensa cu e nobonan, cu mester ta e futuro dje Partido, a cay den e mesun politica negativo populista di AVP.

Awe AVP kier tilda Fraccion di MEP di a bay tene buitendag na WEB. Un declaracion di e profesor di AVP cu basicamente ta bisa bo: tende ta profesor mi ta, mi sa tur cos miho! Gerlien Croes cu mester bira e futuro lider di AVP a declara: MEP y RAIZ a bay tene rondleiding den WEB. E ta tristo cu cada bes AVP ta reconfirma cu nan no tin interes di Pais Aruba na pecho. Cada bes nan ta comproba cu ta pasobra MEP a logra un proyecto asina importante, cu nan dolor tin mas balor y importancia cu e desaroyo di nos pais y bienestar di nos pueblo. Djis sinta grita contra cada bes, ta prueba cu falta hopi madurez politico den e integrantenan nobo di AVP cu lastimamente ta indica di tambe a bira studiante di e Universidad di AVP. Y kico e Universidad aki a produci nos tur sa caba.