Durante e ultimo simannan pueblo di Aruba por a para testigo pa con Gerlien Croes, Ryçond Do Nascimiento di AVP y Marisol Lopez-Tromp tawata instiga, manipula y malinforma pueblo riba tratatamento di e schadestaat procedure den e caso di Tofanelli & Asscociates. Nan a lastra ex-minister Eddie Briesen manera nan a haya ta bon, nan a gaña y purba manipula pueblo cu e ley ta pa exonera ex-minister Briesen y tambe pa e no wordo persigui y paga bek e claim cu tin contra Land Aruba.

Den bida semper nan ta bisa cu berdad semper ta alcansa e mentira y como politico semper mester informa pueblo cu berdad. Diahuebs ultimo durante tratamento di e ley cu lo mester duna gobierno e machtiging pa paga e suma cu a yega na acuerdo cu n’e entre Land Aruba y Tofanelli & Asscociates, pueblo por a mira con e mascarada di gañamento di e 3 politiconan a cay y con berdad a alcansa mentira.

Na aña 2016, Hof a duna su veredicto y a duna Tofannelli & Associates rason cu e contrato cu nan tawatin cu Land Aruba mester a wordo honra. E sentencia aki a habri caminda pa e grupo aki demanda Land y claim dañonan cu a wordo haci na nan pa incumplimento di e contract.

Na dado momento na aña 2017, despues cu gobierno di AVP a dicidi pa persigui Eddie Briesen inhustamente y a descubri cu Briesen no a haci nada incorecto, ex-minister De Meza ta dicidi pa NO sigui cu e persecusion y trek in e vrijwaringszaak.

El a dicidi pa haci esaki pasobra no tawatin motibo pa sigui e caso aki, mirando cu 3 huez a bisa cu Briesen no a empugna e ley di comptabilidad. Loke De Meza y Eman a lubida ta di informa nan coleganan jong di partido cu ta NAN mes a trek in e caso aki.

Pueblo a nota con e hala nobo (jong) di AVP cu kier core cu e bieunan a cay den e buraco cu nan mes a coba. Pa 5 siman largo nan a lastra Briesen, nan a gaña, manipula y malinforma pueblo di Aruba siendo cu e “bieunan” tawata sa cu loke nan ta bisando NO ta corecto.

Gerlien a busca te hasta un consultant pa yud’e deshaci di e bieunan. El a pidi e consultant conseho con e por haci pa deshaci di e imagen cu Paul Croes, Benny Sevinger, Mike Eman, Mike De Meza y Dowers a crea pa e partido. El a wordo conseha cu e unico manera ta core cu nan. Loke el a lubida ta cu e djacanan biew ta dilanti biento.

E djacanan bieu cu mas experiencia cu n’e a dun’e liña, a lag’e sigui bay te hasta den reunion publico, ainda Gerlien ta coba buraco pa un rato asina despues e cay aden head first.

Nan ta bisa den wega di schaak no tin burico pero aki ta muestra con Gerlien a wordo bergonsa pa su propio partido y mas tristo ainda, publicamente!

E kiebro den partido AVP ta bisto pasobra algun dia despues, Ryçond ta sali den nomber di Gerlien pa exigi un disculpa publico di Mike De Meza pa loke De Meza y Eman a haci cu nan di keda SIN informa nan di e carta aki y laga nan pasa hopi berguensa y cay den buraco cu nan mes a coba.

E ta bisto cu Gerlien Croes tin un meta awor: exigi cabes di Eman y bira lider di AVP y distancia su mes di Paul Croes, Benny Sevinger y tur e bieunan pasobra nan ta daña su “supuesto” bon imagen.