Recientemente e presupuesto 2022 di pais Aruba a ser aproba den Parlamento, sinembargo esaki no a bay sin cu partido AVP a trata di tur forma pa desbarata e presupuesto aki y te hasta nan a bolbe cu nan locura di semper, esta presenta un presupuesto alternativo y cu despues a resulta den un farce total ya cu nan no por a substancia e presupuesto di locura aki cu cifranan concreto.

Alabes den nan ansha y sed pa yega na poder nan a bolbe trece padilanti e acostumbrado lloradera cu e deficit di aña 2022 ta demasiado halto y cu mester a sigui reduci esaki drasticamente, siendo cu Gabinete Wever Croes por medio di su minister di Finanzas Xiomara Maduro ya a percura pa un reduccion substancial di e deficit 2022 cu 306 miyon florin y esaki compara cu aña 2021. Y siguramente den e presupuesto 2023 esaki lo sigui wordo reduci.

No tabatin Pandemia na 2012

Ta increibel con e profetanan di desaster di AVP sin ningun tiki di berguensa kier papia riba deficitnan financiero di pais Aruba. Hecho ta cu tabata hustamente e partido aki a percura pa crea deficitnan astronomico hamas visto den historia di nos pais durante e periodo di 2010 te cu 2014. Na 2010: 188.6 miyon florin, 2011: 325.2 miyon florin, 2012: 443.3 miyon florin, 2013: 332.8 miyon florin y 2014: 405.8 miyon florin na deficit. Sin duda cu nos pais no merece e deficitnan astronomico aki ya cu Gabinete Mike Eman a hereda for di Gabinete Nelson Oduber un suma di 970 miyon florin na final di 2009, esta e placa di Plant NV, BBO di Valero, FDA, BBO local etc. Na lugar di reserva un parti substancial di e suma aki pa por yuda den caso di emergencia, Gabinete Mike Eman a distribi e suma astronomico aki na mas di 400 coordinador, boto di Wubbo Ockels, conferencianan green, Al Gore, Richard Branson, sponsorship di e team di futbol Sparta di Hulanda, huur di learjetnan etc. Como sifuera esaki ta poco e gobierno derochado aki a fia mas di 2 biyon florin den e añanan siguiente. Tur esaki a conduci cu gobierno di Hulanda mester a cay aden y a claba e gobierno di AVP cu un Aanwijzing, KB y Comision di Supervision CAFT. Mester enfatiza cu tur e bagamunderianan financiero aki a sosode den un periodo relativamente trankil ya cu nos pais no a conoce un crisis financiero mundial – manera tabata e caso na 2008/2009 – ni un pandemia mundial cu siguramente lo a derumba henter e sector economico y financiero di nos pais si esaki a sosode.

Pandemia mundial a strangula Aruba na 2020-2022

Cu partido AVP awe ta cuestiona e deficit 2022 ta demostra un biaha mas cu nan no tin ningun tiki di gevoel ni conocemento di cifra ya cu e 228 miyon di deficit 2022 di Gabinete Wever Croes tabata como consecuencia directo di e pandemia mundial (COVID 19) cu a strangula nos pais casi mortalmente for di maart 2020 en adelante. Lamentablemente e caha di gobierno tabata completamente bashi laga atras pa Gabinete Mike Eman y cu un debe nacional di 93% di GDP y tur e proyectonan PPP cu mester a ser paga ainda.

E simpel echo cu si compara e 228 miyon florin di deficit 2022 di Gabinete Wever Croes cu e deficit 2012 di 443 miyon florin di Gabinete Mike Eman, anto tur hende cu sano huicio mester por comprende cu Gabinete Wever Croes a haci un tremendo trabao pa gradualmente trece nos finansas publico den un rumbo positivo atrobe. Ya gobierno a demostra esaki na 2018, 2019 y comienso di 2020, pero lamentablemente esaki a wordo frustra door di yegada di e pandemia mundial na maart 2020..

Finalmente ta increibel pa scucha e ex-Minister di Finanzas di AVP Mike de Meza ta papia sin escrupulo di e situacion financiero di pais Aruba, siendo cu henter comunidad ta testigo cu ta e mesun Mike de Meza aki ta bay den historia como e peor Minister di Finansas cu nos pais a yega di conoce desde entrada di Status Aparte cu su recordnan di deficit durante 2010-2014, anto sin cu nos pais tabata den pandemia. Pues un politico fracasa totalmente. E miho cos cu Mike de Meza por haci ta di bati retirada for di politica y stop di sigui papia nonsense den pueblo.