Partido Movimiento Electoral di Pueblo (MEP) a cuminsa bek cu encuentronan den tur districto. Encuentronan aki, ‘Ban Top’, ta pa duna mas informacion posibel na e pueblo di Aruba.
E prome ‘Ban Topa’ a tuma luga diamars anochi na Centro Teresita na San Nicolas na unda cu e sala tabata completamente yen. Pa varios siman, a extende invitacion na henter Aruba pero specialmente na esnan cu ta biba pariba di brug pasobra pa Partido MEP ta necesario scucha kico ta biba den comunidad pa asina por tuma accion riba e diferente temanan.
E prome ‘Ban Topa’ tabata sumamente exitoso. Varios orador a hiba palabra durante e anochi riba diferente topico. Despues a sigui e ronda di pregunta, comentario y sugerencianan di esnan presente. Partido a scucha tur punto cu a wordo treci dilanti y ta trahando riba un plan di accion pa asina demostra e pueblo di San Nicolas e resultado despues di e encuentro ‘Ban Topa’.
Den nomber di Partido MEP, Lider di MEP y Prome Minister di nos pais, señora Evelyn Wever-Croes ta gradici tur esnan, organisadornan, sostenedornan y demas participantenan, cu a haci e encuentro aki posibel y exitoso.
E union entre candidatonan di Partido MEP a resalta e anochi aki. Tur tabata presente y a participa di un forma of otro, sea pa duna informacion individual y of pa contesta e preguntanan cu a wordo haci.
“MEP a demostra di ta un ekipo y a demostra con fuerte e union ta. Union ta e forsa di Partido MEP”, Lider di MEP a enfatisa.
Partido MEP ta invita pueblo di Savaneta y vecindario y Aruba en general, pa e siguiente ‘Ban Topa’ dia 6 di juli, 2023.
