Partido MAS kier duna pueblo claridad riba e Bridge Loan

Despues di a tuma nota den prensa tocante e Bridge Loan pa nos pais, Partido MAS, kier trece claridad riba e asunto aki. Partido MAS kier primeramente trece padilanti na pueblo kico exactamente un Brige Loan ta encera pa asina pueblo por husga pa su mes kico ta e riesgo y consecuencianan envolvi. Ora di papia di un Bridge Loan ta trata aki di un areglo financiero temporario cu mester wordo paga den un tempo corto di menos cu un aña.

Basicamente por bisa cu e ta un prestamo den corto plaso diseña pa duna financiamento temporario di cual hopi biaha ta wordo uza pa cumpra propiedadnan of haci renobacion di esaki. Un Bridge Loan tin tanto beneficio pero tambe riesgo. Pa loke ta trata beneficionan: un Bridge Loan ta un financiamento a corto plaso y bo por keda cla pa haya e prestamo lihe. E Desbentaha di un Bridge Loan ta cu ta trata di “ratenan” mucho mas halto cu un prestamo normal. Partido MAS ta consciente di esaki y ta preocupa pa cu e pago di esaki. Partido MAS ta cuestiona ken ta esun responsabel pa e prestamo aki mirando cu na final di dia sino ta pueblo ta esun cu lo bay paga p’e.

Partido MAS ta cuestiona con pueblo di Aruba lo bay por paga esaki sin cu nos perde nos Status Aparte of e autonomia cu nos tin den Reino Hulandes. Esakinan ta preguntanan cu Partido MAS ta haci pueblo di Aruba y kier conscientisa comunidad riba e asunto aki como cu e boet pa incumplimento di pago di tipo di prestamonan asina ta sumamente halto y riesgoso.