Recientemente partido politico MAS, lidera pa parlamentario Marisol Tromp, a publica nan plan di partido 2025-2029. Den e plan aki e partido ta elabora riba meta- y prioridadnan principal cu nan tin pa e siguiente periodo di gobernacion, como tambe aspectonan cu nan ta considera retonan importante y urgente.

Un di e meta- y prioridadnan principal ta e aspecto di bienestar y salud pa un y tur. MAS ta remarca cu cuido medico accesibel y di calidad no ta un luho, sino un derecho pa tur ciudadano. E partido ta sigura nan compromiso na cuido preventivo, un miho acceso na cuido di salud mental y sosten pa gruponan vulnerabel manera adultonan mayor y muchanan.

Otro punto di prioridad cu e partido ta resalta ta e necesidad pa un economia husto y sostenibel. MAS ta enfatisa cu Aruba mester bira menos dependiente di un solo sector economico y pa e motibo ey ta boga pa diversificacion y innovacion, cu un enfasis fuerte riba energia renobabel, tecnologia y agricultura. “Door di amplia e base economico, nos ta crea oportunidad pa un y tur y ta construi un futuro resiliente,” e partido a resalta.

Proteccion di naturalesa y medio ambiente ta otro meta y prioridad di e partido. MAS ta boga pa un maneho sostenibel cu ta balansa crecemento economico cu conservacion di medio ambiente. Nan ta subraya e necesidad pa leynan ambiental estricto y inversionnan den tecnologianan berde cu ta garantisa cu e rikesanan natural di Aruba ta keda preserva

Otro punto di prioridad pa partido MAS ta gobernacion transparente y liber di corupcion. E partido ta subraya cu corupcion ta mina e confiansa den gobierno y ta perhudica sociedad den su totalidad. Den su programa MAS ta enfatisa cu e partido ta para pa un gobierno habri y honesto, unda transparencia y responsabilidad ta central. Nan ta boga pa leynan mas estricto contra corupcion, proteccion di denunciantenan (klokkenluiders) y mecanismonan di control independiente.

Pa MAS seguridad social y empleo ta otro meta y prioridad. E partido ta resalta cu cada individuo mester haya e oportunidad pa contribui na sociedad. Nan kier fortifica empleo y seguridad social door di duna prioridad na trahadonan local, promove condicionnan laboral flexibel y haci vivienda y costo di bida pagabel y accesibel pa un y tur.

Partido MAS ta sigura cu compromiso pa tin un Aruba unda tur hende ta sinti nan mes scucha y balora. “Nos ta kere den un sociedad unda respet, igualdad y sostenibilidad ta e norma. Cu e plan aki nos kier demostra cu un miho futuro ta posibel. Hunto nos por construi un Aruba unda tur hende por crece, florece y contribui na un isla fuerte, husto y sostenibel,” e partido a enfatisa.

Apart di e meta- y prioridadnan cu partido MAS a presenta den nan plan di partido, nan ta destaca cuater reto importante y urgente cu nan kier atende den e siguiente periodo di gobernacion. E cuater reto aki ta admision y integracion di migrantenan, determinacion di e capacidad di carga di pais Aruba, combatimento di corupcion, y proteccion di naturalesa y economia.

Prome reto presenta ta admision y integracion di migrante, un topico di hopi importancia pa comunidad. Partido MAS a señala cu e maneho di migracion pa Aruba ta un reto grandi cu ta exigi reglanan cla y proteccion di e comunidad local. Nan ta indica cu door di e fluho di migrantenan, hopi biaha pa yena buraconan den mercado laboral, ta bin un presion extra riba infrastructura, cuido medico, enseñansa y medio ambiente.

Segun e partido e maneho actual ta permiti demasiado migrante sin suficiente regulacion, loke ta conduci na problemanan y pa e motibo ey MAS ta boga pa un maneho di migracion controla cu ta tene cuenta cu e capacidad di carga di e pais y ta duna prioridad na bienestar di e poblacion local.

MAS su enfoke di migracion ta dirigi riba yena vacaturanan cu forsa laboral local y unda esaki no ta posibel, trahadonan di afo ta ser admiti bou di condicionnan estricto. E partido ta remarca cu e maneho aki ta percura pa un uso controla di e capacidad di carga di Aruba y ta duna prioridad na e bienestar di e poblacion local

Di dos reto cu e partido a presenta den nan plan di partido ta e capacidad di carga di Aruba. Partido MAS ta señala cu un di e preguntanan mas grandi cu Aruba tin cu confronta ta con leu e isla kier crece. Nan ta subraya cu Aruba tin espacio limita y pa e motibo ey mester tuma decisionnan tocante e futuro di e pais.

E partido ta trece dilanti dos pregunta cu nan pregunta ta esencial pa loke ta trata determinacion di capacidad di carga. Uno ta si Aruba kier ta un pais cu un poblacion creciente di kisas mey miyon habitante of si Aruba kier ta un pais cu ta crece den forma controla y ta ofrece espacio pa hobennan profesional regresa, traha y contribui na e progreso di e pais.

MAS kier pa gobierno desaroya un vision cla riba cuanto crecemento Aruba por carga y asina cu esaki ta cla, por atende problemanan den enseñansa, cuido medico, naturalesa y otro sectornan den un miho forma.

Otro reto cu e partido a trece dilanti ta combatimento di corupcion. MAS ta destaca cu corupcion ta sigui ta un reto grandi den gobierno y institutonan relaciona. E partido ta kere cu ta posibel pa combati corupcion efectivamente y ta compromete su mes na un gobierno transparente y integro unda tumamento di decision ta sucede den forma habri y honesto, pa asina restaura e confiansa di ciudadanonan den gobierno

Di cuater reto importante y urgente cu e partido a presenta ta trata proteccion di naturalesa y economia. Partido MAS a resalta cu presion di turismo riba Aruba, hunto cu uso intensivo di e naturalesa y espacionan publico, ta causa deterioro y daño.

Nan ta menciona como ehempel e ‘turismo di aventura’ cual tin un impacto grandi riba e flora y fauna. E partido ta enfatisa cu sin reglanan cla y proteccion, Aruba su recursonan natural ta sufri, cual ta un di e motibonan pakico turistanan ta bin Aruba. Pa evita esaki MAS ta enfatisa cu mester bin cu leynan estricto pa proteha Aruba su naturalesa y medio ambiente, sin duda pa tuma decisionnan dificil.

“MAS ta boga pa un maneho sostenibel cu ta balansa tanto crecemento economico como conservacion di naturalesa. Solamente asina nos por conserva nos pais pa futuro generacionnan y ofrece un miho calidad di bida na tur hende riba Aruba,” e partido a subraya.