Durante un sesion informativo cu e partido nobo, Hubentud Treciendo Cambio (HTC) a haci via nan rednan social, nan a contesta algun pregunta cu comunidad a haci pa aclaria cierto duda y inkietud cu por tin pa loke ta trata e grupo di hobennan cu ta conforma e partido aki.

Nan a afirma cu otro aña e partido lo cuminsa traha pa pueblo di Aruba. Tambe lo duna di conoce nan ‘Programa di Cambio’ dia 3 di januari di aña 2021, pa pais Aruba por conoce pa eleccionnan, cu cual presidente di partido, Gilbert Webb a bisa cu kier informa pueblo di Aruba tur loke nan kier haci.

Di esaki, el a señala cu nan kier concentra riba e hendenan cu kier progresa na Aruba. Nan lo concentra riba sectornan unda mester debido atencion, unda e hendenan kier logra algo den nan bida, como educacion y diferente sectornan cu partido HTC kier di e pueblo su sosten.

Pa loke ta trata e situacion di dump Parkietenbos, cu diasabra ultimo comunidad por a mira con e luga tabatin un candela masha grandi mes, Webb a declara cu e gobernantenan di aworaki no ta treciendo un solucion. Y tocante casonan di pedofiel, Webb a señala cu “nan kier pasa e ley aki te ultimo momento di eleccion pa asina por mira cu e hendenan a vota pa nan, esey nan kier, nan ta manipulador”.

Ademas, el a manifesta cu si comunidad por a mira ki temanan ta tratando den parlamento na e momentonan aki, ta casonan cu ta innecesario aworaki. Mesun cos ta sucede cu partidonan tradicional cu e ley cu a caba di pasa, cu ta trata di ley di financiamento di partidonan politico, no ta haci e campaña mas simpel. “Y den direccion ey nos kier bay, nos kier ta simpel den nos campaña pa hende por confia den nos”, Webb a sigura.

Nan e momentonan aki, e partido ta conta cu e participacion di seis miembro. Segun Webb a bisa e candidatonan lo sigui aumenta; pero prome nan tin cu pasa un pre-screening y na januari 2021 un screening. Esey ta wordo selecta, Webb a declara cu no tur hende por ta candidato.

Partido HTC ta presenta un campaña cu hala atencion di hende na unda nan a bin cu e frase ‘Bril ciego bo tin?’ Segun Webb a declara, esey ta algo normal cu tur hende ta haci den nan bida diario y nan a dicidi di print algun T-shirt y pechinan cu e frase, cu no ta algo negativo. Al contrario ta algo positivo y ta motiva nan como hoben cu ta bay dilanti hunto pa un cambio. “Nos ta enfoca riba tur situacion, e frase ta bisa bon cla, hasta cu bril bisti nan no ta wak.”

Un siguido di nan pagina di Facebook a realisa e pregunta si nan ta di acuerdo di bay den coalicion na aña 2021, pa locual nan a contesta cu e parti ey pueblo lo dicidi. “Si pueblo dicidi di bay den coalicion, nos ta bay.”

Tocante e situacion di Covid, Webb a comenta cu pa esaki nan por a cuminsa actua desde cuminsamento di e pandemia, pa motibo cu na e momentonan aki “e baca a hoga” segun el a sigura. Por mira con e situacion ta, pero cu nan por structura esey si nan drenta den gobierno.

Pa finalisa, un di otro preguntanan cu a haci ta kico ta nan pensamento pa loke ta trata matrimonio di mesun sexo. Un di nan integrante di nomber Latoyer Briggs a expresa cu su pensamento ta “pro igualdad”.