Feliz dia pueblo di Aruba, di nos curason un bendicion pa cada un di boso cu ta mira nos a traves di social media, corant y website di noticia. Aruba, nos di HTC ta para akinan awe dilanti di e edificio aki caminda e Departamento den dje tin cu pone hopi atencion den e forma con ta atende cu e parti di Ministernan cu ta desvia di un ley y ta beneficia nan mes den gobierno.

Husticia mester ta pa un y tur. Pueblo ta wordo trata comosifuera ta mucha chikito y no sa kico ta nifica transparencia.

Laga nos cuminsa na bisa cu ora bo ta papia di transparencia bo ta papia di demostra loke bo ta haci den e forma cu tur por wak y cu lo por verifica cu e informacion saca ta corecto y husto.

kico di berdad ta nifica transparencia di un gobierno. Transparencia den gobierno ta simplemente nifica un forma honesto cu bo ta demostra caminda bo ta wak cuanto placa ta drenta caha di gobierno y tambe cuanto placa gobierno a gasta y ken tur nan a paga.

Caminda lo mustra salario di minister nan te na esun nan mas abou.

Tambe mester inclui pago di tur compania of persona priva cu gobierno ta paga, hopi importante pa pone e descripcion completo pakico e transferencia ta y pa ki proyecto of pa ki motibo.

No lubida aki nos ta papia di placa di pueblo, placa di e sodo cu nos a traha duro pe y ta contribui na nos pais cu merece di duna informacion kico ta wordo haci cu e placa.

Manera nos a bisa den cuminsamento cu nos lo bin cu un plataforma moderno cu lo demostra tur cos y caminda cu pueblo tin acceso pa mira y sa e berdad.

Esaki ta Transparencia y honestidad.

PUEBLO puntra bo mes, unda tabata tin of tin transparencia den e gobernacion actual y den pasado? Aki laga nos cuminsa na splica bo cu ora bo ta papia di transparencia
bo no ta papiando di mustra pueblo un papel y splica pueblo kico e papel ta y con el a yega eynan, esey ta djis un papel y djis un splicacion, pueblo no a pasa den e caminda cu abo a pasa como minister, pueblo kier un forma cu e tin acceso na mira loke pueblo kier mira.

Si bo drenta un restaurant pa come, bo kier wak menu, bo no kier yega y  wordo manipula y wordo bisa cu ta e tal cuminda ey tin y ta esey bo tin cu come.

Prijs ta conta segun bo budget y e tipo di cuminda ta segun bo smaak.

Den tiki palabra bisa, pueblo kier informacion completo na nan alcance 24/7.

Nos ta hopi desapunta pa mira con gobierno semper a gaña pueblo, pa laga pueblo kere cu ainda nan ta transparente siendo ta gewoon manipula nan ta manipula e celebro di nos ciudadanonan cu ta zwak. Gobierno no ta transparente y tur sa e realidad ey.

Riba cua plataforma y website bo a yega di wak loke nos tur te dia di awe kier wak, e salario nan di tur cu ta cobra sumanan halto y pueblo ta sufri.
Unda bo ta wak cua placa a core den cua cuenta pa mira e husto cu e bolo a wordo reparti pa tur haya.
Pueblo e bolo ta grandi, e hambranan a come tur nan so y laga e resto den muri hamber.

Ken ta esnan cu ta y a sufri ayera y awe y mañan?

Tin basta cu e inhusticia cu nos ta  wak riba nos pida baranca chikito cu ta Aruba.
Un Aruba cu parce cu pueblo no tin voz mas, parce di ta e color di solo (Geel) y color di blachi mata (Berde).

Ki dia nos lo por come fruta di loke nos a traha duro pe. Nos ta un pais chikito cu por hopi.  Awe bo falta un boter di salo pa pone den cuminda, bo a perde bo cas y demas cos anto niun di nan conoce bo, pero durante campaña tur kier briya y gaña stima bo.

Pueblo nos tur ta ser humano y nunca nos  mester lubida di unda nos a bin, con duro nos ta traha pa nos por pone un pida pan riba mesa, debe nan mester wordo paga.

Aruba no ta un pais cu transparencia nos pais tin manipuladonan ta maneha nos pais, idea y locura cu ta pasa den nan mente y nan ta kere cu asina nan tin pueblo na pecho,

Ban ta sincero cu otro abo sa cuanto placa e miyonario ney ta ranca den scondi tras di nos lomba, cuanto nan ta cobra, y ta ken nan ta yuda, esey nos ta yama transparencia?.

Mi pregunta na pueblo ta: Unda tabata tin y tin transparencia den plan di desaroyo pa San Nicolas cu nos sa ta fraude so sa tin enbes di tin San Nicolas na pecho paso henter pueblo ta contribui na nos isla.
Bunitesa ta bon, pero esey no ta suficiente pa San Nicolas, ki manera esey ta yuda nos pais pa bay pa dilanti. Ki manera corupcion ta hiba e pais bay pa dilanti.

Unda tin transparencia den caso nan cu a wordo yama yen nomber di animal, asina bruto nan a maltrata e  pueblo.

Unda tabata tin transparencia den e debe di Citgo, caminda miyones a wordo pordona y caminda tin hopi ta pasa hamber na cas. Na unda cu ta pordona compania grandi y e chikito nan no, chikito nan cu actualmente ta pasando duro pa sobrevivi.

Unda tin transparencia caminda cu proyecto nan cu ta wordo duna na friends & Family so.

Pueblo Aruba mester un cambio y aire fresco y ta basta cu hungamento cu lego kere ta mucha chikito nos ta.

Kier papia di transparencia partido HTC ta demostra cifra, demostra honestidad y ta para pa igualdad.

Hunto pa dilanti nos ta bay!