Campaña electoral ta den full swing caminda ya caba partidonan a cuminsa reuni na nan sede. Algun di nan a bin cu imagen nobo, otronan a cuminsa parti sticker riba caminda y otro, manera partido HTC, a haci un transmision en bibo riba rednan social sigurando cu “dia 6 di december ban pa e cambio.”

Pa esaki, lider di partido, Gilbert Webb a splica cu desde 2021 cu tabata ultimo eleccion partido, Hubentud Treciendo Cambio (HTC) a sa di demostra te na ultimo cu tabata un partido “fuerte” y cu “a para duro y firme cu a demostra cu HTC a bin pa para pa igualdad y pone ser humano central,” Webb ta sigura.

Pa su persona ta hopi importante cu awor cu gobierno a cay y pa dia 6 di december tin eleccion, votadonan asisti na urnanan consciente.

For di 2021 te cu awor, su persona tabata den un pauze unda el a yega di sigui su estudionan y a gradua cu tres Master Degree. “Pero aworaki mi ta para fuerte, duro y firme pa e pueblo di Aruba,” el a sigura.

“Tur dia cu mi ta lanta cu sacrificio, e no ta facil, e ta hopi dificil. Y di curason mi a dicidi di haci esaki cu e curashi pa sigui demostra como ciudadano cu locual mi ta pusha pa abo progresa riba e pida di baranca aki. Ta hopi importante pa mi y pa tur ciudadano,” el a bisa.

El a gradici cada candidato cu hunto cune a participa den eleccion di 2021, y a bisa cu su persona como lider di partido “kier a bisa na cada un di mi ex-candidatonan hopi danki. Boso a lucha y boso a para firme aparte di tur e bullying, aparte di tur e persecucion, tur lo cual tabata manera un castigo cu e personanan aki a haya y no ta husto. Mi persona tambe a pasa den varios cosnan,” el a sigura.

Por a recorda cu na aña 2021, HTC tabata haci campaña den bario di Noord specificamente na caya Semeleerstraat, den esaki, lider di e partido Gilbert Webb hunto cu otro dos candidato a haya un agresion di parti di tres persona hoben cu tabata den auto, el a cualifica e acto aki como intento di asesinato ora e auto a bay direccion riba nan masha duro mes y Webb a haci un denuncia.

Webb ta keda para riba e punto cu e ta un persona cu kier sigui lucha pa esnan mas vulnerabel, por ehemplo esnan cu no tin cuminda na cas, muchanan cu ta bay scol sin come pasobra schoolgeld ta caro, pasando den circunstancianan dificil, pero por ta pa no ta den persecucion nan ta den silencio y p’esey mi semper a dicidi di sali na bienestar di pueblo.”

Pa e motibo aki, Webb a informa cu e ta cla pa eleccion 2024 y cu firmamento ta bay tuma luga proximamente pa partidonan cu no ta den parlamento y HTC ta un di nan, “HTC ta pidi di curason na e pueblo di Aruba pa para firma pa e cambio di berdad,” el a bisa.

Ademas, el a trece dilanti cu gobierno actual “a scoge un opcion y e opcion ta na nan bienestar y no di e pueblo su bienestar. Nan a scoge pa worry riba poder y esaki ta loke HTC simplemente no ta acepta. Pasobra esnan cu ta sinta den gobierno y esnan cu a haya oportunidad mester a haci bon uso di esaki.”

Costo di bida ta aumenta, gasolin ta aumenta, problemanan social ta sigui aumenta manera e ta señala y cu den tres aña aki “kico nan a haci pa bo bienestar?”

Webb ta señala cu HTC ta para firme unda nan kier crea un parke di atraccion no solamente pa personanan cu ta desea di pasa un dia cu nan famia pero tambe pa esey trece un entrada extra pa pais Aruba, “cu lo boost e economia di Aruba. San Nicolas ta bay haya e parke di atraccion aki, San Nicolas ta bay ta esun cu ta bay crece y mira algo back, pasobra cada ciudadano cu ta riba e pida di baranca aki nos tin cu wak en general pero hopi problema ta pasando na Aruba.”

Aparte di e parke di atraccion, el a anuncia cu pais Aruba tambe lo genera varios cupo di trabou pa hendenan local “ na unda cu minimo 1.000 persona, aparte di studio cu nos a haci riba esaki, mas di 1.000 persona lo haya trabou directo y indirecto na e parke dia atraccion aki.”

Den su opinion, ministernan cu awor ta demisionario cu a trece dilanti e topico di Surplus “a grita masha duro riba esaki.”

Den su opinion, Webb ta enfatisa cu no por ta asina cu tin otro prioridadnan ta poni na prome luga y e pueblo ta sigui sufri “un Aruba unda nos tur ta uni hunto pa paga impuesto continuo ta mira cu hopi cos ta laga di desea, derecho di pueblo ta wordo trapa, prijsnan ta keda aumenta y esnan cu tin cu haci cambio ta sigui disfruta y no ta importa pero ta basta, un Aruba nos ta, un deseo nos tin, ta pa hiba Aruba pa dilanti y pa nos tur ta parti di un cambio di berdad, HTC ta cla pa eleccion.”

Den ultimo eleccion di aña 2021, HTC a participa pa prome biaha cu un cantidad di 6 candidato unda como partido nan haya 249 voto den total y Gilbert Webb como lider a haya 154 voto, e tempo ey nan a señala cu den eleccion aki “hopi cos a bay robes durante conteo, no tabatin camara pa verifica e berdad y a tarda pa manda urnanan aden, y por a reemplasa papel tambe na fabor di esnan presente.”