Partido HTC, Hubentud Treciendo Cambio, a presenta su programa di partido cu nan ta denomina “Programa di Cambio”, den e cual nan ta trece dilanti e plannan cu nan tin como partido politico den e marco di eleccionnan cu lo tuma luga na luna september di e aña aki.

Di esaki, a selecciona algun punto cu ta destaca den e programa, cu ta basa riba 64 punto.

Pa cuminsa, nan ta presenta TIA (Tecnologia Innovativo Arubano), cu ta trata di un sistema moderno, na unda tur placa efectivo ta bay den un sistema online. Tur placa na Aruba ta bira digital y ta wordo traspasa di un persona pa otro den forma digital, e moneda ta keda cu e mesun diseño y mesun balor.

Ademas, tur impuesto actual na Aruba lo wordo elimina di e forma cu ta aworaki y lo usa un strategia moderno y mas confiabel di sistema nobo TIA. Nan ta resalta cu esaki lo trece menos gasto pa comerciantenan y personanan individual.

Igualmente, tur papelnan di identificacion como rijbewijs, seguro, AZV, papel 5 florin, entre otro como servicio di awa y coriente, lo ta den un solo dashboard di TIA, cu e persona lo haya cu un codigo priva na unda lo ta tur informacion di e persona aki den e plataforma TIA.

Pa specifica, awa, coriente y pago di impuesto cu ta existi na e momentonan aki, y tur loke a menciona caba, automaticamente lo bay den sistema TIA. E persona no mester paga su servicio pa via cu TIA, mediante Transaction Fluctuacion System, ta kitando esey caba. Tur transaccion ta contribui na e pais, segun loke e partido ta sigura, cu un impuesto hopi abao y rasonabel, e porcentahe ta calcula riba e balans di e persona.

Otro proposicion cu ta forma parti di e programa di cambio ta resalta cu tur turista cu ta drenta Aruba cu placa cash of den su carchi di banco, lo deposita nan placa na un banco y lo ricibi e Tourist Weeks Card (TWC), cu ta percura cu e turista tambe ta paga impuesto igual cu hende local pa e tempo cu lo keda na e isla, pa motibo cu cada transaccion turistico ta un contribucion na impuesto TIA.

TIA tambe ta trece cune e pakete di Lost Job Cover pa personanan cu ta perde nan trabao. Esey lo tin un duracion di seis luna y lo yuda e persona mientras e ta den buskeda di otro trabao. Den 4 luna e persona mester zorg pa haya trabao riba su mes y si no por logra hay’e, gobierno tin 2 luna pa automaticamente ubik’e den sector priva of sector publico.

Tur persona cu ta cobra bijstand of onderstand lo ricibi un trabao temporal di 4 ora pa dia na facilidadnan di Gobierno, pero no como un ambtenaar. Departamento di Asunto Social lo yuda e persona aki den e buskeda di trabao y nan lo keda obliga pa atende scol nobo practico – cu nan tin den nan plannan di gobierno – pa asina por haya un miho trabao.

Den e parti educativo, nan a destaca cu lo percura pa habri universidad practico den idioma Papiamento y gobierno lo reconoce y acredita esaki. Aki bachelor tin un duracion di tres aña y master degree 1 aña, studiantenan lo por ricibi studielening for di gobierno.

Tur baby cu nace na Aruba automaticamente lo ricibi fam di e tata, e mayornan lo ricibi autoridad comun. Den caso cu nan divorcia, ambos mayor tambe ta keda cu autoridad comun.

Pa loke ta trata renobacion di infrastructura, nan a informa cu lo kier traha riba centro di adictonan na San Nicolas cu mas seguridad, na unda tur adicto of ambulante mester keda interna aden pa tempo indefini y no mag di sali. Lo ofrece nan luga pa drumi como cama, scol, trabao, cuminda, pa percura cu nan tin un miho bida. Ora nan por refleha cu nan bida a cambia, nan tin cu pidi gobierno por escrito pa nan por sali. Si e peticion wordo aproba, e persona tin cu haya guia di departamento di psicologia y psikiatria pa por haya trabao.

Centro di detencion KIA tambe lo wordo renoba cu maximo seguridad y proteccion pa trahado- y detenidonan cu un plan structural nobo. Tur dia nan mester haya training disciplinario bao guia profesional, como tambe educacion.

Den e parti penal, pa pedofiel, atraco, abuso domestico, matamento y fraude lo subi castigo minimo di 40 aña te maximo 60 aña di prizon cu ta bida largo. Pa caso penal di crimen pisa cu ta regarda menor di edad te na adulto e castigo minimo lo subi di 18 aña te 35.

Guarda Nos Costa lo haya un edificio nobo y grandi na unda trahadonan lo tin mas seguridad y un structura nobo. Lo trata e detenido husto como ser humano, segun loke nan ta resalta, y lo deporta segun e structura nobo di un forma profesional y den corto tempo.

Tur polis cu ta abusa di nan poder durante un situacion cu un problema ta surgi of ta bay atende un persona su comportacion y ta actua contra ley, esey lo tin su consecuencia pisa p’e, e lo ricibi un castigo penal, si e ta culpabel solamente.

Di sistema di salud, nan kier traha mas hospital na Aruba cu partinan moderno y parti di remedinan natural. Tur dokter y specialista lo haya training specifico pa por tin un bista diferente di e parti di remedinan natural y un plan nobo di innovacion. Di esaki, a trece dilanti cu lo percura pa habri un Centro Planta Natural pa cuminsa produci remedinan di tera, pa asina baha full e gasto di cumpra remedi sintetico traha cu kimico cu ta bin di afo.

Pa loke ta trata dump di Parkietenbos, nan ta menciona cu ta bay haya un sistema nobo yama “Underground Solutions” (Solucion bao tera). Pa hopi aña caba tin paisnan cu ta haci esaki y a resulta bon. Tambe lo tin e parti di e programa Asociacion Internacional di Desperdicio Solido (International Solid Waste Association) cu no lo representa un molestia pa ningun persona riba tera.

Di migracion, HTC lo trece e Plan Social Inmigratorio (PSI), na unda nan lo duna permiso na tur persona sin documento cu actualmente ta na Aruba pa un tempo di tres luna, loke ta encera cu e persona aki por traha legalmente. Lo prolonga e permiso te cu un maximo di seis luna, esaki lo ta forma parti di un amnistia, despues di e seis luna e persona lo mester bandona Aruba.

Den proceso aki, Aruba lo papia cu Hulanda pa yega na un consenso pa tuma e maneho di e frontera haciendo uso di e militarnan na Aruba, cu lo percura pa tin control 24/7 pa controla e frontera.

Pa loke ta trata salarionan, nan ta comenta cu nan lo baha salarionan di ministernan y lo aumenta e salario minimo netto pa 2.000 florin pa luna den sector priva y publico.