Partido H.T.C a introduci nan prome candidatonan pa eleccion 2024

Den un transmision en bibo riba rednan social, partido Hubentud Treciendo Cambio (HTC), a traves di su lider Gilbert Webb a introduci dos candidato cu ta bay subi lista, y ademas a pidi ciudadanonan pa dia 21 di october pasa firma pa partido HTC por participa den eleccion.

“Mi ta bay presenta e candidato number dos riba lista di partido H.T.C, na unda cu e candidato aki ta un hoben cu ta bon prepara y ta cla pa asina representa bo den Parlamento di Aruba y tambe sin duda, firme y fuerte, mesun cos cu lo cual partido semper a bin ta parti,” Webb a sigura.

Victor Rosario a expresa cu “mi ta orguyoso pa anuncia cu mi ta #2 di e lista di H.T.C. Mi compromiso ta pa stimula un cambio significativo y pa amplifica e voznan di nos hubentud den gobierno. Huntos, nos por crea un futuro mas briyante. Mi enfoke principal ta pa mehora e bida di muchanan cu no ta tin mucho fortuna riba nos isla, pa sigura cu nan por tin e oportunidadnan cu nan merece.”

Den su opinion, Webb ta sigura cu su partido ta bay 100% pa yuda cada ciudadano riba e pida di e baranca di aki “un partido cu ta lucha te final pa loke e pueblo kier.”

Candidato number 3 riba lista ta Lino Croes, ken a sigura cu e partido aki ta trata di un grupo chikito di individual cu kier cambia Aruba “nos a bini hunto e aña aki pa haci un cambio pa Aruba, el a bisa cu su area di specialisacion ta e departamento di Educacion y Social, nos lo haci tur cos cu nos lo bisa lo cumpli cune.”

Pa loke ta trata e Plan di Partido, como prome punto ta e Parke di Atraccion na San Nicolas (Colony)– Prome fase ta cuminsa na 2025. Universe Shine Park Aruba.

Di dos punto, tur compania cu ta opera un Hotel, Airbnb of Motels, tin e oportunidad pa contribui un pago anual na Arubus pa por duna servicio di “free shuttle” na su clientenan for di e compania na e parke y parke na e compania pa tur turista, y tambe local por tambe haci uso di e “free shuttle” si tin un ticket cumpra. Asina lo reforma Arubus pa para back riba su pia.

Di tres punto, Habri “Crèche School Publico” CSP, cu un tarifa abou pa luna, cu por yuda mayornan cu no tin manera pa logra paga un crèche priva, of mayornan cu ta traha trabou shift. Tur mayor cu nan baby ta bay un crèche y ta desea di mantene na e crèche priva, gobierno lo asisti cu un Kinderopvangtoeslagen cu 25%.  Personanan cu lo traha na e Crèche Publico aki, lo ta personanan bon prepara, educa y cu a studia pa e funcion aki.

Pa di cuatro punto, sinta na mesa cu Organisacion Internacional Club di Paris, pa yega na acuerdo pa alivia Aruba di debenan inaceptabel, reduci debe nacional, busca cooperacion mas profundo cu Hulanda pa cu e structura di financia y cumpli cu landspakket na un forma mas miho. Sinta na mesa cu CAFT pa logra scucha nan preocupacion y demostra nan plan concreto pa un mehoracion mutuo pa Aruba. E 63 miyon surplus cu a ricibi for di SVB|AZV|ATA pa haci bon uso di esaki enfoca riba proyecto necesario na pais Aruba.

Di cinco punto, elimina BBO|BAZV|BAVP|BBO na frontera y Introduci un BTW general na 12.5% na 2025 y bah’e despues na 10% na 2027.

Di seis punto, reduci winstbelasting y inkomstenbelasting.

Otro puntonan cu nan ta trece dilanti den nan plan ta bureau contra abuso laboral pa enfoca riba trece trankilidad y flexibilidad laboral. Haci tur comision|Incentiva un entrada vast riba payslip, ademas di legalisacion di cannabis medicinal y recreacional pa 2026.

Baha edad di pensioen na 60 aña y pone pre-pensioen na 58 aña di edad (Cu pre-pensioen ta traha 4 ora so y trabou ta paga 4ora, SVB ta paga 4ora) Aumenta placa di pensioen cu 60%.

Lo construi un Cas Social Flat na unda cu tur persona cu menos recurso por logra aplica pa un hypotheek y cumpra un cas na un prijs rasonabel entre 30,000.00 Florin pa 70,000.00 Florin.

Pa loke ta trata migracion, reduci gasto di otorgamento di permiso di stranhero, innova esaki cu tempo corto y aumenta e BTW pa nan na 17% den mercado laboral pa suavisa e gasto di permiso y proceso structural pero stricto. Personanan indocumenta lo haya 1 luna di dispensacion pa registra den nos sistema legalmente na Dimas y contribui na impuesto,cu un proceso stricto di permiso.

Actualisa e ley di Screening di Ministernan pa asina evita cu tin cualkier persona ta bira minister pa interes personal, entre otro puntonan.

Di su parti, tanto Rosario como Croes a señala cu nan ta bin campañando duro “pa husticia, empoderamento, sostenibilidad, oportunidad y solidaridad. Hunto nos lo forma un futuro cu ta refleha nos balornan y aspiracionnan mutuo.”