(AP) – Abogadonan di Partido Popular di Cambodia a entrega un demanda dialuna bao orden di e partido su lider, ex-Prome Minister Hun Sen, acusando un activista di derechonan di difamacion y pidiendo compensacion pa dañonan causa.
A entrega e keho na Corte Municipal di Phnom Penh contra Soeng Sen Karuna, hefe diputado di Cambodia su grupo mas grandi di derechonan ADHOC. E demanda aki ta sigura cu remarcanan haci pa Soeng Sen Karuna ta causa deshonor na e partido. Corte ta anticipa di determina cua ley lo ta aplicabel pa e keho.
Tabatin casonan anteriormente den cual oposicion politico di e partido a ser ordena paga dañonan causa despues di ser declara culpabel di difamacion.
E keho , segun un copia mira pa The Associated Press, ta referi na comentarionan cu Soeng a haci den un entrevista recien den cual e ta acusa cu e partido a usa e pais su corte como herment pa stroba y intimida su oposicion politico. E demanda ta acusa cu e remarcanan tabata exagera y deshonesto ademas di causa cu e publico lo odia e partido prome cu e eleccion di Senado e luna aki. E entrevista a ser publica online pa The Cambodia Daily, un website di noticia basa na Merca cu a evoluciona for di un corant di e mesun nomber cu a stop di publica na Cambodia den aña 2017 a causa di un disputa di impuesto cu gobierno, cual den e tempo aki tabata lidera pa Hun Sen.
Den e respuesta na e demanda, Soeng Sen Karuna a bisa cu e entrevista tabata den sosten pa fortalece husticia social y democracia sin cu ta sirbi e meta di cualkier partido politico. El a bisa cu e no tabatin intencion di ataca ningun partido politico ni tampoco individual, y cu cualkier persona cu ta bisa cu e tabata atacando un partido specifico tabata birando su palabranan.
Hun Sen riba diadomingo a anuncia su intencion di entrega un demanda.
“No tin mas tolerancia for di mi persona na boso tur mas ora cu bo ataca mi persona of Cambodian People’s Party. Boso a yega di tin tolerancia cu nos?” Hun Sen a bisa den un publicacion riba Facebook.
“Mi kier clarifica cu Cambodian People’s Party no lo duna un chens na ningun individuo pa insulta nos partido mas. Nos mester haya hustifica pa nos mes via e sistema di corte,” el a declara.
Hun Sen di 71 aña a retira como Prome Minister augustus ultimo despues di lidera Cambodia pa 38 aña. Su yiu homber, Hun Wanet, a bira su sucesor.
